पीटीआय, नवी दिल्ली देवतांच्या नावावर मते मागितल्याने पंतप्रधान नरेंद्र मोदी यांना सहा वर्षे निवडणुका लढविण्यास अपात्र करावे, अशी मागणी करणारी याचिका दिल्ली उच्च न्यायालयाने सोमवारी फेटाळली. न्या. सचिन दत्ता यांनी सांगितले की, ही याचिका निराधार असून चुकीची आहे. याचिकाकर्त्याचे अनेक गैरसमज झाल्याचे याचिकेद्वारे दिसून येते. दिल्लीतील वकील आनंद जोंधळे यांनी देवता आणि प्रार्थनास्थळांच्या नावावर मते मागितल्याबद्दल मोदींविरुद्ध कारवाई करण्याची विनंती न्यायालयाला केली होती. यापूर्वी त्यांनी निवडणूक आयोगाकडेही याबाबत तक्रार केली होती. याचिकेत म्हटले आहे की पंतप्रधानांनी ९ एप्रिल रोजी उत्तर प्रदेशातील पिलिभीत येथे भाषण केले होते, जेथे त्यांनी ‘‘हिंदू आणि शीख देवतांच्या आणि त्यांच्या प्रार्थनास्थळांच्या नावाने केवळ मतेच मागितली नाहीत तर विरोधी राजकीय पक्षांविरुद्ध मुस्लिमांची बाजू घेत असल्याची टिप्पणीदेखील केली होती.’’याचिकाकर्त्याने आरोप केला आहे की, त्यांच्या भाषणादरम्यान पंतप्रधानांनी मतदारांना ‘‘हिंदू देवता आणि हिंदू पूजास्थान तसेच शीख देवता आणि शीख प्रार्थनास्थळ’’ या नावाने भाजपला मतदान करण्याचे आवाहन केले. पंतप्रधानांना धार्मिक देवता आणि प्रार्थनास्थळांच्या नावावर मते मागण्यापासून रोखावे असे याचिकेत म्हटले होते.
