“कॅन्सरचं नाव ऐकलं की गरीब आणि मध्यमवर्गीयांची हिंमत हरते, म्हणून…”, पंतप्रधान मोदींचं मोठं विधान

नरेंद्र मोदी म्हणाले, “कॅन्सर या आजाराचं नाव ऐकलं की गरीब आणि मध्यमवर्गीय हिंमत हरायला लागतात. गरीबांना याच वाईट चक्रातून, चिंतेतून बाहेर काढण्यासाठी देश स्वस्त उपचारासाठी पावलं उचलत आहे. मागील काही वर्षात कँसरच्या उपचारासाठी औषधांच्या किमतीत मोठी कपात करण्यात आली. आयुष्मान भारत योजना आज affordable आणि inclusive healthcare च्या बाबतीत जागतिक संकेत बनलीय. PM-JAY अंतर्गत देशात २ कोटी ६० लाखपेक्षा अधिक रूग्ण मोफत उपचार घेत आहेत.”

“देशाने नव्या वर्षाची सुरुवात १५ ते १८ वर्षे वयोगटातील मुलांच्या लसीकरणापासून केली होती. त्याप्रमाणे नव्या वर्षाच्या पहिल्या महिन्यात पहिल्याच आठवड्यात भारत १५० कोटी म्हणजेच १.५ बिलियन लसीकरणाचा ऐतिहासिक टप्पा पार करत आहे. आज भारताच्या वयस्क लोकसंख्येपैकी ९० टक्क्यांपेक्षा जास्त लोकांना लसीचा एक डोस मिळाला आहे,” असंही मोदींनी सांगितलं.

“केवळ ५ दिवसांमध्ये दीड कोटी मुलांचं लसीकरण”

मोदी पुढे म्हणाले, “केवळ ५ दिवसांमध्ये दीड कोटी मुलांचं लसीकरण केलं आहे. हे यश संपूर्ण देशाचं आणि प्रत्येक सरकारचं आहे. मी या यशासाठी विशेष करून देशातील संशोधक, लस निर्माते, आरोग्य कर्मचारी यांचे आभार मानतो. सर्वांच्या प्रयत्नांमुळेच देश या संकल्पाच्या शिखरावर पोहचला आहे. याची सुरुवात आपण शून्यापासून केली होती.”

“आतापर्यंत पश्चिम बंगालला ११ कोटी करोना लसीचे डोस मोफत”

“केंद्र सरकारने आतापर्यंत पश्चिम बंगालला ११ कोटी करोना लसीचे डोस मोफत दिले आहेत. बंगालला दीड हजारपेक्षा अधिक व्हेंटिलेटर, ९ हजारहून अधिक नवे ऑक्सिजन सिलिंडर दिले आहेत. 49 PSA नवे ऑक्सिजन प्लँट्स देखील सुरू झाले आहेत,” असं मोदींनी सांगितलं.

हेही वाचा : “पंतप्रधानांच्या सुरक्षेचा कांगावा करणाऱ्या भाजपाचा प्रोपगंडा फुटला” ; व्हिडिओ शेअर करत नाना पटोलेंनी साधला निशाणा

“२०१४ पर्यंत देशात अंडर ग्रॅज्युएट आणि पोस्ट ग्रॅज्युएट जागांची संख्या ९० हजारच्या जवळपास होती. मागील ७ वर्षांमध्ये यात ६० हजार नव्या जागांची भर पडली आहे. २०१४ मध्ये आपल्याकडे केवळ ६ एम्स होते. आज देश २२ एम्सच्या सशक्त नेटवर्ककडे वाटचाल करत आहे,” असंही मोदींनी नमूद केलं.