पाकमध्ये जायची हिंमत दाखवून मोदींनी बलवान असल्याचे दाखवून दिले: मेहबुबा

यावेळी मेहबुबा मुफ्ती यांनी गेल्यावर्षी नरेंद्र मोदी यांनी अचानकपणे पाकिस्तानला दिलेल्या भेटीचेही कौतुक केले. दोन्ही देशांमध्ये तणाव असूनही मोदी यांनी पाकिस्तानमध्ये जाण्याची हिंमत दाखवली. यावरून मोदींचे सामर्थ्य दिसून येते. यापूर्वीच्या पंतप्रधानांना पाकिस्तानमध्ये जायचे होते. मात्र, ते हिंमत करू शकले नाहीत. त्यामुळेच मोदींची लाहोर भेट ही त्यांच्या सामर्थ्याची कल्पना देणारी असल्याचे मेहबुबा मुफ्ती यांनी सांगितले.

गेल्या काही महिन्यांमध्ये काश्मीर खोऱ्यात सुरक्षा दलाचे जवान आणि स्थानिकांमध्ये वारंवार संघर्ष होताना दिसत आहे. स्थानिकांकडून सुरक्षा दलाच्या जवानांवर दगडफेक होण्याचे प्रकार अनेकदा घडले आहेत. याशिवाय, याठिकाणच्या अनेक बँका लुटण्याचेही प्रसंग घडले आहेत. या तणावपूर्ण परिस्थितीच्या पार्श्वभूमीवर गुरूवारी भारतीय लष्कराकडून गेल्या १५ वर्षातील सर्वात मोठी शोधमोहीम हाती घेण्यात आली होती. या मोहिमेदरम्यान शोपियान जिल्ह्यात सुरक्षा दलाचे जवान आणि स्थानिकांमध्ये संघर्ष झाला होता. यामध्ये एका नागरिकाचा मृत्यू झाला होता. तर तीन जवान जखमी झाले होते.