Donald Trump यांच्यावरील हल्ल्यानंतर पंतप्रधान मोदींचा संताप; म्हणाले, “माझ्या मित्रावर…”,

दरम्यान, ट्रम्प यांच्यावरील या हल्ल्यानंतर भारताचे पंतप्रधान नरेंद्र मोदी यांनी एक्सवर एक पोस्ट करून या हल्ल्याचा निषेध नोंदवला आहे. तसेच ट्रम्प लवकरात लवकर बरे व्हावेत यासाठी प्रार्थना केली. या हल्ल्यावरून मोदी यांनी चिंता व्यक्त केली. यासह “राजकारण आणि लोकशाहीत हिंसेला थारा नाही.” अशा शब्दांत मोदी यांनी या हल्ल्याचा निषेध नोंदवला.

मोदी यांनी म्हटलं आहे की माझे मित्र व अमेरिकेचे माजी अध्यक्ष डोनाल्ड ट्रम्प यांच्यावर झालेल्या भ्याड हल्ल्यामुळे मी चिंतेत आहे. मी या हल्ल्याचा तीव्र निषेध करतो. राजकारण व लोकशाहीत हिंसेला थारा नाही. ट्रम्प लवकरात लवकर बरे व्हावेत यासाठी मी प्रार्थना करेन. आम्ही या हल्ल्यात निधन झालेल्या लोकांच्या कुटुंबियांबरोबर आहोत. तसेच या हल्ल्यात जखमी झालेले अमेरिकन नागरिक लवकर बरे व्हावेत यासाठी प्रार्थना करतो.

हे ही वाचा >> Donald Trump : अमेरिकेचे माजी राष्ट्राध्यक्ष डोनाल्ड ट्रम्प यांच्यावर प्रचारसभेत गोळीबार, गोळी चाटून गेल्याने रक्तस्राव; शूटरचा मृत्यू!

नेमकं काय घडलं?

डोनाल्ड ट्रम्प पेन्सल्व्हेनियामधील प्रचारसभेत बोलत असताना बंदुकीतून गोळी सुटल्याचा आवाज आला. ही गोळी ट्रम्प यांच्या कानला चाटून गेली अन् ते खाली कोसळले. तसेच लोकांमध्ये गोंधळ उडाला. मात्र ट्रम्प यांच्या अंगरक्षकांनी लगेच त्यांना घेराव घातला आणि त्यांना व्यासपीठाच्या मागे घेऊन गेले. त्यावेळी ट्रम्प यांच्या कानावरून रक्त ओघळत असल्याचं दिसत होतं. त्या स्थितीतही त्यांनी पुन्हा एकदा उभे राहून एक घोषणा दिली आणि ते तिथून निघून गेले. यावेळी एकूण चार वेळा गोळीबार झाल्याचा आवाज आल्याचं वृत्त रॉयटर्स या वृत्तसंस्थेने दिलं आहे. तसेच हल्लेखोर प्रचारसभेच्या बाजूलाच असलेल्या एका इमारतीत होता अशी माहिती देखील समोर आली आहे.