पंतप्रधान नरेंद्र मोदी यांनी आज दिल्लीत आयोजित जी-२० देशांच्या संसदीय अध्यक्षांच्या शिखर परिषदेला संबोधित केलं. यावेळी पंतप्रधान नरेंद्र मोदी म्हणाले, जगभरात शांतता आणि बंधूभाव निर्माण करणं गरजेचं आहे. सर्वांनी एकत्र येऊन पुढे जाण्याची हीच योग्य वेळ आहे. नरेंद्र मोदी यांनी आपल्या भाषणात दहशतवादाचा उल्लेख केला आहे. पंतप्रधान मोदी म्हणाले, आज जगाच्या वेगवेगळ्या भागांमध्ये जे काही घडतंय, त्यापासून कोणीही दूर राहिलेलं नाही. दहशतवादाच्या झळा सगळ्यांनाच बसतायत. पंतप्रधान नरेंद्र मोदी म्हणाले, संपूर्ण जग हे वेगवेगळ्या संकटांशी संघर्ष करत आहे. संकटांशी झुंजणारं हे जग मानवतेच्या हिताचं नाही. मानवतेसमोर वेगवेगळी आव्हानं आहेत. जगाच्या विकासासमोर जी संकटं आहेत त्यावर मात करून मानवकेंद्रित विचारसरणीसह आपल्याला पुढं जावं लागेल. वन अर्थ, वन फॅमिली, वन फ्युचर हा दृष्टीकोन ठेवून आपल्याला पुढं जावं लागेल. दहशतवादावर भाष्य करत पंतप्रधान नरेंद्र मोदी म्हणाले, भारत गेल्या अनेक वर्षांपासून दहशतवादाचा सामना करत आहे. भारतात दहशतवाद्यांनी आजवर हजारो निष्पाप लोकांची हत्या केली आहे. २० वर्षांपूर्वी आमच्या संसदेवरही दहशतवादी हल्ला झाला होता. संसदेचं सत्र सुरू असताना दहशतवाद्यांनी आमच्या संसदेला लक्ष्य केलं होतं. खासदारांना ओलीस ठेवून त्यांच्या मागण्या पूर्ण करून घेण्याचा त्यांचा डाव होता. अशा अनेक दहशतवादी कारवाया आणि दहशतवादी संघटनाना तोंड देत भारत इथवर पोहचला आहे. पंतप्रधान नरेंद्र मोदी म्हणाले, दहशतवादाच्या व्याख्येबाबत जगातील अनेक देशांचा ढोंगीपणा उघड झाला आहे. आता जगाला समजलंय की, दहशतवाद किती मोठं आव्हान आहे. जिथे जिथे दहशतवादी कारवाया घडतात, ज्या कुठल्या स्वरुपात घडतात या घटना मानवतेच्या विरोधातच असतात. त्यामुळे या प्रश्नांवर सर्वांनी कठोर होणं गरजेचं आहे. हे ही वाचा >> इस्रायल-हमास युद्धाचे उत्तर प्रदेशात पडसाद, मुख्यमंत्री आदित्यनाथ यांचे कडक निर्देश; म्हणाले, “भारताच्या भूमिकेविरोधात…” नरेंद्र मोदी म्हणाले, मला एका गोष्टीकडे सर्वांचं लक्ष वेधायचं आहे की, इतक्या वर्षांनंतरही दहशतवादाच्या व्याख्येवर सर्व देशांचं एकमत होत नाही, हे खूप क्लेशदायक आहे. आजही दहशतवादाच्या मुद्द्यावर आंतरराष्ट्रीय अधिवेशनांमध्ये एकमत होत नाही. जगला त्याची प्रतीक्षा आहे. जगाच्या या वृत्तीचा मानवतेच्या शत्रूंना फायदा होत आहे. दहशतवादाविरोधातील लढाईत आपण सगळे एकत्र कसं काम करू शकतो यावर जगातील वेगवेगळ्या देशांच्या संसदेने आणि प्रतिनिधींनी विचार करावा.
