बीजिंग : अमेरिकेचे अध्यक्ष जो बायडेन यांनी चीनचे अध्यक्ष क्षी जिनपिंग यांचा उल्लेख हुकूमशहा म्हणून करणे हे अतिशय ‘हास्यास्पद आणि बेजबाबदारपणाचे’ आहे अशी संतप्त प्रतिक्रिया चीनने व्यक्त केली आहे. या शाब्दिक चकमकीनंतर चीन आणि अमेरिकेदरम्यानचा तणाव कमी होण्याच्या शक्यतेला पुन्हा तडा गेला आहे.
अमेरिकेच्या कॅलिफोर्नियामध्ये एका कार्यक्रमात बोलताना अध्यक्ष बायडेन यांनी क्षी आणि चीन या दोहोंबद्दल काही टिप्पणी केली होती. बायडेन म्हणाले की, ‘हेरगिरी करणाऱ्या बलून प्रकरणाने उद्भवलेल्या तणावामुळे क्षी ओशाळवाणे झाले होते. काय घडले हे कळत नाही तेव्हा ती हुकूमशहांसाठी लाजिरवाणी बाब असते’. ही टिप्पणी तथ्यहीन आहे आणि राजनैतिक शिष्टाचारांचे गंभीर उल्लंघन करते तसेच चीनच्या राजकीय प्रतिष्ठेची हानी करते अशा शब्दांमध्ये चीनच्या परराष्ट्र मंत्रालयाचे प्रवक्ते माओ निंग यांनी नाराजी व्यक्त केली. तसेच बायडेन यांनी उल्लेख केलेले बलून हे केवळ संशोधनाच्या हेतूने सोडण्यात आले होते याआधीच्या दाव्याचा त्यांनी पुनरुच्चार केला. अमेरिकेचे परराष्ट्रमंत्री अँटोनी ब्लिंकेन हे याच आठवडय़ात चीनच्या दौऱ्यावर गेले होते. त्या वेळी त्यांनी अध्यक्ष क्षी जिनपिंग यांच्यासह अनेक महत्त्वाच्या राजनैतिक अधिकारी आणि नेत्यांशी चर्चा केली होती.
