“प्रियंका गांधी वाराणसीतून लोकसभा निवडणूक लढणार असतील तर…”, ठाकरे गटाच्या खासदाराचा मोठा दावा

ठाकरे गटाच्या खासदार प्रियांका चतुर्वेदी म्हणाल्या, आम्ही सगळे (इंडिया आघाडी) फ्रंट फूटवर खेळतोय. त्यामुळेच पंतप्रधान नरेंद्र मोदी हे संसदेपासून ते लाल किल्ल्यावरील भाषणापर्यंत सगळीकडेच केवळ इंडिया आघाडीवर टीका करत आहेत. त्यावरून समजतंय की पंतप्रधान अस्वस्थ आहेत. आम्ही सध्या २६ पक्ष एकत्र आलो आहोत. या २६ पक्षांचे जितके आमदार-खासदार आहेत त्या प्रमाणात मतदार आहेत. आम्ही एकत्र येऊन ही लढाई लढत आहोत. त्यामुळेच पंतप्रधान नरेंद्र मोदी आणि केंद्रीय गृहमंत्री अमित शाह यांच्या मनात भिती निर्माण झाली आहे.

खासदार चतुर्वेदी म्हणाल्या, प्रियांका गांधी या अमेठी, रायबरेली किंवा वाराणसीतून लोकसभा निवडणूक लढणार असतील तर मला वाटतं वाराणसीतली जनता त्यांना साथ देईल. प्रियांका गांधी वाराणसीतून लोकसभा निवडणूक लढतील आणि जिंकतील.

हे ही वाचा >> “खुनाचा आरोप होताच, राज ठाकरे फरार”, स्वत:च सांगितला जुना प्रसंग, म्हणाले…

प्रियांका चतुर्वेदी म्हणाल्या, इंडिया आघाडीतले पक्ष एकत्र बसतील, चर्चा करतील. वेगवेगळ्या मतदार संघांबाबत चर्चा करतील. कुठल्या मतदार संघासाठी कोणता उमेदवार योग्य आहे यावर सगळ्यांची मतं घेतली जातील. जर वाराणसी मतदारसंघात प्रियांका गांधी यांचं गणित जमून आलं तर त्या वाराणसीतून लोकसभा निवडणूक लढतील. इंडिया आघाडी ही प्रियांका गांधी यांना जिंकवण्यासाठी काम करेल आणि प्रियांका गांधी वाराणसीतून लोकसभा निवडणूक जिंकतील.