“ही देशाच्या गृहमंत्र्यांसाठी शरमेची बाब”, सैफवर हल्ला करणारा बांगलादेशी घुसखोर असल्याचं समजताच ठाकरे गटाचा हल्लाबोल

शिवसेनेच्या (ठाकरे) खासदार प्रियांका चतुर्वेदी यांनी थेट केंद्रीय गृहमंत्री अमित शाह यांना लक्ष्य केलं आहे. चतुर्वेदी म्हणाल्या, “देशाच्या सीमा इतक्या नाजूक करून ठेवल्या आहेत की बांगलादेशी केवळ बेकायदेशीरपणे या सीमा ओलांडून भारतात प्रवेश करत नाहीत तर आपल्या देशात दहशत पसरवत आहेत, गुन्हे करत आहेत. ही देशाच्या गृहमंत्र्यांसाठी शरमेची बाब आहे. त्यांना सीमा ओलांडून भारतात प्रवेश करण्यास कोण मदत करतंय? इथे येऊन त्यांना शासकीय कागदपत्रं मिळवणं, नोकऱ्या मिळवणं आणि भयंकर गुन्हे करणं इतकं सोपं कसं काय? इतक्या सहजपणे बांगलादेशी भारतात या कारवाया कसे काय करतायत? इतर नेत्यांना देशद्रोही म्हणण्याआधी केंद्रीय गृहमंत्र्यांनी एक गोष्ट मान्य करायला पाहिजे की स्थलांतर व घुसखोरी थांबवण्यात त्यांचं हे अपयश देशद्रोहाचंच कृत्य आहे”.

प्रियांका चतुर्वेदी काय म्हणाल्या?

चतुर्वेदी म्हणाल्या, “केंद्र सरकारबरोबर राज्य सरकारही अनेक पातळ्यांवर अपयशी ठरलं आहे. राज्यात बेकायदेशीरपणे येणाऱ्या स्थलांतरितांना शोधणे, त्यांची ओळख पटवून राज्यात कायदा व सुव्यवस्था राखण्यासाठी योग्य कारवाई करण्यात फडणवीस सरकार अपयशी ठरलं आहे. डबल इंजिन सरकार पुन्हा एकदा तोंडावर आपटलं आहे. गुप्तचर यंत्रणा व प्रशासनाचं हे मोठं अपयश आहे. ही घटना खूप लज्जास्पद आहे”.

आरोपीला पाच दिवसांची पोलीस कोठडी

पोलिसांनी अटक केलेल्या आरोपीचं नाव मोहोम्मद शरीफूल इस्लाम शहजाद असं आहे. तो ३० वर्षांचा आहे. हा आरोपी चोरीच्या उद्देशाने सैफच्या घरी शिरला होता. त्याच दरम्यान ही घटना घडली. मोहोम्मदला आज न्यायालयात हजर करण्यात आलं असून न्यायालयाने त्याला ५ दिवसांची पोलीस कोठडी सुनावली आहे.