श्रीनगर : काश्मीरमधील वृत्तछायाचित्रकार आणि पुलित्झर पुरस्काराच्या मानकरी सना इर्शाद मट्टो या शनिवारी फ्रान्सला जाण्यासाठी दिल्ली विमानतळावर गेल्या असता इमिग्रेशन अधिकाऱ्यांनी त्यांना विमान प्रवासास मनाई केली.
पॅरिसमध्ये एका प्रकाशन सोहळय़ासाठी तसेच छायाचित्र प्रदर्शनासाठी सना जाणार होत्या. त्यांना दिल्ली विमानतळावरील इमिग्रेशन अधिकाऱ्यांनी कोणतेही कारण न देता अटकाव केला. तुम्ही देश सोडून जाऊ शकत नाही, असे त्यांना सांगण्यात आले.
मला फ्रान्सने व्हिसा मंजूर केल्यानंतरही दिल्ली विमानतळावरील आंतरराष्ट्रीय कक्षातील अधिकाऱ्यांनी प्रवासास मनाई केली, असे सना यांनी म्हटले आहे. जम्मू-काश्मीर पोलीस दलातील सूत्रांनी सांगितले की, सरकारने आंतरराष्ट्रीय प्रवासास मनाई केलेल्या पत्रकारांच्या यादीत सना यांचाही समावेश आहे.
