राष्ट्रवादीच्या काँग्रेसच्या अध्यक्षपदावरून निवृत्त होण्याची घोषणा शरद पवार यांनी मंगळवारी (२ मे) केली. ‘लोक माझे सांगाती’ या राजकीय आत्मकथेच्या सुधारित आवृत्तीच्या प्रकाशन कार्यक्रमात शरद पवारांनी हा निर्णय जाहीर केला. यानंतर एकच खळबळ उडाली होती. शरद पवारांच्या निर्णयानंतर नेते, पदाधिकारी, कार्यकर्ते भावुक झाले होते. शरद पवारांनी अध्यक्षपद सोडू नये, यासाठी राज्यभरातून राजीनामे दिले जात आहेत.
अशातच शरद पवार यांच्या निर्णयावर काँग्रेस नेते राहुल गांधी आणि तामिळनाडूचे मुख्यमंत्री एम.के. स्टॅलिन यांनी खासदार सुप्रिया सुळे यांच्याशी फोन करत चर्चा केली आहे. राष्ट्रवादी काँग्रेसच्या दोन ज्येष्ठ नेत्यांनी ‘टाइम्स ऑफ इंडिया’ला याबाबत माहिती दिली आहे.
“राहुल गांधी आणि एम.के. स्टॅलिन यांनी सुप्रिया सुळे यांच्याकडून शरद पवारांच्या राजीनाम्याचं कारण जाणून घेतलं आहे. तसंच, शरद पवारांनी आपल्या निर्णयाचा पुनर्विचार विचार करावा, असं मत राहुल गांधी आणि एम.के. स्टॅलिन यांनी सुप्रिया सुळेंकडे व्यक्त केलं,” अशी माहिती राष्ट्रवादीच्या एका नेत्याने दिली.
तर, “शरद पवारांनी २०२४ साली होणाऱ्या लोकसभा निवडणुकीपर्यंत अध्यक्षपदी कायम राहावे, अशी इच्छा राष्ट्रवादीशी विचार जुळणाऱ्या पक्षांतील नेत्यांची आहे,” असं राष्ट्रवादीच्या दुसऱ्या नेत्याने सांगितलं.
हेही वाचा : “अजित पवार सांगतायत कुठेही जाणार नाही, पण…”, संजय राऊतांचं सूचक विधान; म्हणाले, “राजकारणात…!”
केरळमधील राष्ट्रवादी काँग्रेसचे नेते पी.सी. चाको म्हणाले, “केरळचे मुख्यमंत्री पिनाराई विजयन यांनी शरद पवारांनी घेतलेल्या निर्णयानंतर चर्चा करण्यासाठी बोलावलं होतं. शरद पवारांनी अध्यक्षपद सोडू नये, असं बिगर भाजपाच्या नेत्यांचं मत आहे. तसंच, मीही या निर्णयाचा पुनर्विचार करण्याची विनंती शरद पवारांना केली आहे,” असं पी.सी. चाको यांनी म्हटलं.
