पीटीआय, नवी दिल्ली
राज्यसभेचे सभापती जगदीप धनखड यांच्याविरुद्ध अविश्वास ठरावावरून कोषागार आणि विरोधी पक्षांनी गुरुवारी गोंधळ घातला. त्याला प्रत्युत्तर म्हणून, काँग्रेस नेतृत्वाचे अब्जाधीश गुंतवणूकदार जॉर्ज सोरोस यांच्याशी संबंध असल्याच्या भाजपच्या आरोपांमुळे गुरुवारी दुपारी राज्यसभेचे कामकाज दिवसभरासाठी तहकूब करण्यात आले. अशाच गोंधळामुळे बुधवारीही राज्यसभेचे कामकाज दोनदा तहकूब झाले होते.
दुपारी शून्य तासात नियोजित कामकाज तहकूब करण्याच्या सहा नोटिसा सभापती धनखड यांनी फेटाळल्या. तसेच नोटिशीत नमूद केलेल्या बाबी स्वीकारण्याचे आवाहन विरोधकांना केले. त्यावर अनेक विरोधी सदस्यांनी आक्षेप घेतला. त्यावरून भाजपच्या जे. पी. नड्डा यांनी काँग्रेस अध्यक्ष आणि राज्यसभेतील विरोधी पक्षनेते मल्लिकार्जुन खरगे यांच्यावर पत्रकार परिषद घेऊन धनखड यांच्यावर टिप्पणी केल्याबद्दल टीका केली. अध्यक्षांच्या निर्णयावर प्रश्नचिन्ह किंवा टीका केली जाऊ शकत नाही. असे करणे म्हणजे सभागृहाचा आणि सभापतींचा अवमान आहे,’ असे नड्डा यावेळी म्हणाले.
नड्डा यांनी काँग्रेस नेते आणि सोरोस यांच्यातील संबंधाच्या आरोपाचा पुनरुच्चार केला. तसेच ते भारताला अस्थिर करण्यासाठी अब्जावधी डॉलर्सचा पुरवठा करीत असल्याचा आरोप केला. गांधी आणि सोरोस यांच्यात काय संबंध आहेत, हे देशाला जाणून घ्यायचे आहे, असे नड्डा म्हणाले. यामुळे सभागृहात गदारोळ झाला आणि दुपारी २ वाजेपर्यंत कामकाज तहकूब करण्यात आले.
हेही वाचा : अजितदादा सहकुटुंब पवारांच्या भेटीला, वाढदिवसाच्या शुभेच्छा देण्यासाठी नेत्यांची गर्दी
…तर लोकशाहीला धोका : खरगे
राज्यसभेतील विरोधी पक्षनेते मल्लिकार्जुन खरगे यांनी ‘पॉईंट ऑफ ऑर्डर’ मांडण्याचा प्रयत्न केला. सभागृहात बेकायदापद्धतीने आरोप होत आहेत, तुम्ही ते ऐकून सत्ताधाऱ्यांना प्रोत्साहन देत आहात, असे खरगे सभापतींना म्हणाले. ‘लोकशाही दोन चाकांवर चालते, एक विरोधी पक्ष, दुसरा सत्ताधारी पक्ष आणि तुम्ही पंच आहात. परंतु तुम्ही एकतर्फी निर्णय घेत असाल तर देश आणि लोकशाहीला धक्का असल्याचे खरगे यांनी सांगितले. यानंतर झालेल्या गोंधळादरम्यान सभापती धनखड यांनी सभागृहाचे कामकाज दिवसभरासाठी तहकूब केले.
