‘ब्रह्मज्ञानी’ माणसाने बलात्कार करणे पाप नाही – आसाराम बापू

न्यायालयाच्या ४५३ पानाच्या निकालपत्रात हे सर्व मुद्दे नमूद केले आहेत. एकेकाळी आसारामचा विश्वासू असलेल्या राहुल साचारला आसारामच्या कुटियामध्ये थेट प्रवेश होता. २००३ साली मी राजस्थान, हरयाणा आणि अहमदाबाद येथील आश्रमात आसारामला मुलींचा विनयभंग करताना पाहिले होते असे राहुलने साक्ष देताना सांगितले.

आसाराम टॉर्च लाईट मारुन त्याचे सावज हेरायचा. आसारामसोबत तीन मुली असायच्या. त्यांच्यावर निवडलेल्या मुलीला कुटियापर्यंत आणण्याची जबाबदारी सोपवलेली होती. मुलगी निवडण्यासाठी तो या तीन मुलींसोबत आश्रम परिसरात फिरायचा असे साचारने सांगितले. एका संध्याकाळी अहमदाबादमधल्या आश्रमात मी कुटिया जवळच्या भिंतीवर चढून आसारामला मुलीचा विनयभंग करताना पाहिले होते असे साचारने सांगितले. त्यानंतर आसाराम मुलींसोबत असा का वागतो ? म्हणून मी पत्र लिहिले आणि ते पत्र आचाऱ्याला दिले पण आसारामने ते पत्र वाचून दुर्लक्ष केले असे राहुलने सांगितले.