RBI अ‍लर्ट: २३ मे रोजी ‘ही’ सुविधा काही तासांसाठी असणार बंद

एनईएफटी सेवा अधिक कार्यक्षम करण्यासाठी रात्री १२ ते २३ मे रोजी दुपारी २ वाजेपर्यंत ही सेवा बंद असणार आहे. त्यामुळे या वेळेत पैशांचा व्यवहार करता येणार नाही. जवळपास १४ तास ही सेवा बंद असणार आहे. अपग्रेड दरम्यान बँक खातेधारकांना त्याचे अपडेट मिळतील असंही आरबीआयकडून सांगण्यात आलं आहे. १८ एप्रिल २०२१ रोजीही असंच अपग्रेडशन करण्यात आलं होतं.

एनईएफटीच्या माध्यमातून दोन लाखांपर्यंतचा व्यवहार केला जातो. या माध्यमातून एका बँकेतून दुसऱ्या बँके खात्यात थेट पैसे पाठवण्याची सुविधा आहे. यासाठी दोन्ही बँक खातेधारकांकडे इंटरनेट बँकिंग सेवा असणं गरजेचं आहे. डिजिटल बँकिंगला प्रोत्साहन देण्यासाठी ६ जून २०१९ रोजी आरबीआयने एनईएफटी सेवा निशुल्क केली आहे. ही सुविधा यापूर्वी सकाळी ८ ते संध्याकाळी ७ पर्यंत होती. त्यानंतर ही सुविधा २४ तास उपलब्ध करून देण्यात आली.