नोटाबंदी; आता बिग बाजारमध्येही मिळणार २००० रूपये

नोटाबंदीमुळे हैराण झालेल्या नागरिकांना आता बिग बाजारने दिलासा दिला आहे. डेबिट कार्ड असणाऱ्यांना बिग बाजारमधून २ हजार रूपये काढता येईल. येत्या गुरूवारपासून (दि. २४) या सेवेस प्रारंभ होणार आहे. नागरिकांच्या मदतीसाठी बिग बाजार मिनी एटीएम सुरू करणार आहे. त्यासाठीची प्रक्रियाही अत्यंत सोपी आहे. नागरिकांनी आपले डेबिट कार्ड स्वाईप करून पिन क्रमांक टाकून २००० रूपये घेता येतील. बिग बाजार समूहाचे अध्यक्ष किशोर बियाणी यांनी ट्विटरवरून ही घोषणा केली. या निर्णयामुळे बँका व एटीएमसमोरील गर्दी कमी होण्याची शक्यता आहे.
मोदी सरकारने ८ नोव्हेंबर रोजी नोटाबंदीच्या निर्णयाची घोषणा केली होती. ३० डिसेंबर २०१६ नंतर ५०० व १००० रूपयांच्या नोटा चालणार नसल्याचे जाहीर करण्यात आले होते. त्याचबरोबर २००० आणि ५०० रूपयांच्या नव्या नोटा व्यवहारात येणार असल्याचेही सांगण्यात आले होते. तेव्हापासून बँका आणि एटीएमबाहेर लोकांच्या मोठ्या रांगा लागल्या आहेत. १३ दिवसांनंतरही ही गर्दी कमी होताना दिसत नाही. आपल्या नोटा बदलून घेण्यासाठी नागरिकांकडून बँकाच्या चकरा सुरू आहेत.