करोना रोखण्यासाठी केंद्र सरकारचा मोठा निर्णय; चीनसह सहा देशांमधून भारतात येणाऱ्या प्रवाशांना आता…

या सहा देशांमधून भारतात येणाऱ्या प्रवाशांना आता प्रवास सुरु करण्याआधी एअर सुविधा पोर्टलवर टेस्टचा रिपोर्ट अपलोड करावा लागणार आहे. आरोग्य मंत्रालयाने दिलेल्या माहितीनुसार, या सहा देशातून येणाऱ्या प्रवाशांना आता १ जानेवारीपासून आरटी-पीसीआरचा निगेटीव्ह रिपोर्ट सादर करावा लागणार आहे. चीन आणि पूर्व आशियाई देशांमध्ये करोनाचे रुग्ण वाढल्यानंतर हा खबरदारीचा उपाय घेण्यात येत आहे.

जानेवारी महिन्यात भारतात करोनाचा फैलाव जलदगतीने होऊ शकतो, अशी शक्यता असल्यामुळे केंद्र सरकारने हा निर्णय घेतला असल्याचे आरोग्य मंत्रालयातील सूत्रांनी सांगितले. मागच्या काही दिवसांपासून आंतरराष्ट्रीय विमानतळांवर मोघमपणे काही प्रवाशांची करोना चाचणी करण्यात येत होती. बुधवारी झालेल्या सहा हजार करोना चाचण्यांपैकी ३९ लोक करोना पॉझिटिव्ह आढळले होते.

मागच्या २४ तासांत करोनाचे २६८ रुग्ण

केंद्रीय आरोग्य मंत्रालयाने आज (गुरुवारी) करोना रुग्णांची ताजी आकडेवारी जाहीर केली. त्यानुसार मागच्या २४ तासांत करोना संक्रमण झालेले २६८ नवे रुग्ण आढळले आहेत. नवीन रुग्णांना मिळून देशभरात आता एकूण ३ हजार ५५२ रुग्ण झाले आहेत. सध्यातरी देशात करोना संक्रमणाचा दर ०.११ टक्के असल्याचेही आरोग्य मंत्रालयाने सांगितले आहे.