Russia Ukraine War : युरोपियन कौन्सिलच्या अध्यक्षांची पंतप्रधान मोदींशी चर्चा, विद्यार्थ्याच्या मृत्यूबद्दल व्यक्त केला शोक

गोळीबारामुळे आज खार्किवमध्ये एका भारतीय विद्यार्थ्याला आपला जीव गमवावा लागला. खार्किवमधील बिघडलेली परिस्थिती ही गंभीर चिंतेची बाब आहे. त्या शहरातील भारतीय नागरिकांची सुरक्षितता आणि सुरक्षा याला सरकारचे सर्वोच्च प्राधान्य आहे, आम्ही स्लोव्हाकियामधील संपूर्ण निर्वासन ऑपरेशनमध्ये समन्वय साधू आणि युक्रेनमधून येणाऱ्या आमच्या विद्यार्थ्यांसाठी व्हिसासाठी त्यांच्या सरकारकडून सहकार्य घेऊ. त्यांना सुरक्षितपणे परत आणणे हे आमचे सर्वोच्च प्राधान्य असेल, असं केंद्रीय मंत्री किरेन रिजीजू यांनी म्हटलं आहे. ऑपरेशन गंगा अंतर्गत ते स्लोव्हाकिया इथं जात आहेत.

युक्रेनमध्ये अडकलेल्या भारतीय नागरिकांच्या सुटकेसाठी केंद्रीय मंत्री हरदीप सिंग पुरी हंगेरीतल्या बुडापेस्टला जात आहेत.

ऑपरेशन गंगा अंतर्गत युक्रेनमधून सुरू असलेल्या भारतीय नागरिकांच्या सुटकेच्या प्रयत्नांना गती देण्यासाठी, पंतप्रधान नरेंद्र मोदी यांनी भारतीय हवाई दलाला या मोहिमेत सामील होण्याचे आवाहन केले आहे. यामुळे कमी कालावधीत अधिक लोकांना बाहेर काढलं जाऊ शकतं. भारतीय हवाई दल आजपासून ऑपरेशन गंगाचा भाग म्हणून अनेक सी-17 विमाने तैनात करण्याची शक्यता आहे.

रशियाने युक्रेनवर केलेल्या हल्ल्यामुळे ऑटोमोबाईल उद्योगावर अनेक विपरीत परिणाम झाले आहेत. ऑटोमेकर फोक्सवॅगन, रेनॉल्ट आणि टायर निर्मात्या नोकिया टायर्ससह अनेक कंपन्यांनी शुक्रवारी रशियाच्या युक्रेनवरील आक्रमणानंतर उत्पादन बंद करण्याची किंवा हलवण्याची योजना आखली. कोविड-१९ मुळे निर्माण झालेल्या जागतिक सेमीकंडक्टर टंचाईमुळे वाहन उद्योग आधीच वाहनांच्या अपुऱ्या पुरवठ्यामुळे अडचणीत आला होता. असं मानलं जातं की या युद्धाचा परिणाम जागतिक अर्थव्यवस्थेवर होऊ शकतो, कारण युक्रेन आणि रशिया अनेक महत्त्वपूर्ण वस्तूंचे उत्पादन करतात, ज्या जागतिक स्तरावर निर्यात केल्या जातात आणि पुरवठा साखळीचा भाग आहेत.

संयुक्त राष्ट्रांनी रशिया-युक्रेन युद्धाच्या पार्श्वभूमीवर सोमवारी तातडीची बैठक बोलावली होती. संयुक्त राष्ट्राच्या इतिहासात फक्त ११व्यांदा अशी बैठक बोलावण्यात आली होती. यावेळी संयुक्त राष्ट्राचे अध्यक्ष अँटोनियो गुटेरेस यांनी बैठकीच्या सुरुवातीलाच आपली भूमिका स्पष्ट केली.“झालं ते पुरे झालं. आता युक्रेनमध्ये सुरू असलेलं युद्ध थांबलंच पाहिजे”, असं अँटोनियो गुटेरेस म्हणाले आहेत. “आता सैनिकांनी पुन्हा त्यांच्या बरॅक्समध्ये परतायला हवं. नेत्यांनी शांतता ठेवायला हवी. सामान्य नागरिकांचं रक्षण व्हायलाच हवं”, असं ते म्हणाले.

सविस्तर बातमीसाठी येथे क्लिक करा.

युक्रेनचे राष्ट्राध्यक्ष वोलोडिमर झेलेन्स्की यांनी सोमवारी सांगितले की, युक्रेनियन शहर खार्किववरील रशियन गोळीबाराच्या प्रत्युत्तरात रशियन क्षेपणास्त्रे, विमाने आणि हेलिकॉप्टरसाठी नो-फ्लाय झोन लागू करण्याचा विचार करण्याची वेळ आली आहे. मात्र नो-फ्लाय झोन कसा आणि कोणाद्वारे लागू केला जाईल हे त्यांनी अद्याप स्पष्ट केलेलं नाही. ते म्हणाले की रशियाने २४ फेब्रुवारी रोजी युक्रेनवर आक्रमण सुरू केल्यापासून गेल्या पाच दिवसांत ५६ रॉकेट हल्ले केले आणि ११३ क्रूझ क्षेपणास्त्रे डागली.

भाजपाचे खासदार सुब्रह्मण्यम स्वामी यांनी पुन्हा एकदा आपल्या पक्षाला घरचा आहेर दिला आहे. रशिया आणि युक्रेनदरम्यान सुरु असणाऱ्या युद्धाच्या पार्श्वभूमीवर सुब्रह्मण्यम स्वामींनी थेट पंतप्रधान नरेंद्र मोदींवर टीका केली आहे. मोदी रशियन राष्ट्राध्यक्ष व्लादीमीर पुतिन यांना माघार घेण्यास सांगणार का असा प्रश्न सुब्रहमण्यम स्वामींनी उपस्थित केला आहे. रशिया हा ब्रिक्स देशांचा सदस्य राष्ट्र असल्याचा संदर्भ देत स्वामींनी ही टीका केली आहे.

सविस्तर बातमी वाचण्यासाठी येथे क्लिक करा.

मानवाधिकार गट आणि युक्रेनचे अमेरिकेतील राजदूत यांनी सोमवारी रशियावर युक्रेनियन लोकांवर क्लस्टर बॉम्ब आणि व्हॅक्यूम बॉम्बसह हल्ला केल्याचा आरोप केला, ज्याचा विविध आंतरराष्ट्रीय संघटनांनी निषेध केला आहे. अॅम्नेस्टी इंटरनॅशनल आणि ह्युमन राइट्स वॉच या दोघांनीही म्हटले आहे की रशियन सैन्याने मोठ्या प्रमाणावर प्रतिबंधित क्लस्टर युद्धसामग्री वापरली असल्याचे दिसून आले आहे, अॅम्नेस्टीने त्यांच्यावर ईशान्य युक्रेनमधील प्रीस्कूलवर हल्ला केल्याचा आरोप केला आहे तर नागरिकांनी आत आश्रय घेतला आहे. रशियाने बंदी असलेला 'व्हॅक्युम बॉम्ब वापरल्याचा आरोप अमेरिकेतील युक्रेनच्या राजदूताने केला आहे. जिनेव्हा करारानुसार रासायनिक, जैविक सह काही शस्त्रांचा युद्धात किंवा युद्धजन्य परिस्थितीत वापर करण्यास पुर्णपणे बंदी घालण्यात आली आहे. यामध्ये 'व्हॅक्युम बॉम्ब'चा समावेश होतो. या बॉम्बचा आघात झाल्यावर स्फोट होतांना आजुबाजुच्या परिसरातील ऑक्सीजनचा मोठ्या प्रमाणात वापर करतो. त्यामुळे याचा स्फोट नेहमीच्या बॉम्बपेक्षा अधिक तीव्र असतो. तसंच या बॉम्बचा स्फोट झाल्यावर ज्या ध्वनी लहरी सर्व बाजूंना वेगाने अधिक जास्त अंतरापर्यंत पसरल्या जातात, त्यामुळे याची संहारकता वाढते, या परिसराचे मोठे नुकसान होते. यामुळेच बॉम्बचा वापर करण्यास बंदी घालण्यात आलेली आहे.

युक्रेन देशावर केलेल्या आक्रमणामुळे FIFA आणि UEFA ने रशियाच्या राष्ट्रीय संघांना आणि क्लबना आंतरराष्ट्रीय फुटबॉलमधून पुढील सूचना मिळेपर्यंत निलंबित केले आहे. या निर्णयामुळे रशियाला यंदाच्या विश्वचषक आणि महिला युरो स्पर्धेतून वगळले जाण्याची शक्यता आहे. रशिया २४ मार्च रोजी विश्वचषक पात्रता प्लेऑफमध्ये पोलंडचे यजमानपद भूषवणार होता आणि जर ते त्या वेळी निलंबित राहिले तर ते विश्वचषकातून बाहेर होतील आणि नोव्हेंबरमध्ये कतारमध्ये अंतिम फेरीत प्रवेश करू शकणार नाहीत.