Russia Ukraine War Live: चर्नोबील न्यूक्लियर डेटा सिस्टमशी संपर्क तुटला; संयुक्त राष्ट्राची माहिती

युक्रेनमधील आक्रमणादरम्यान, रशियाने चर्नोबिल आणि झापोरोझे अणुऊर्जा प्रकल्पांवर नियंत्रण मिळवले. हे आण्विक चिथावणीचे प्रयत्न रोखण्यासाठी केले गेले होते, असं रशियन परराष्ट्र मंत्रालयाने म्हटलंय.

चेरनोबिल अणुऊर्जा प्रकल्पाकडून यूएनच्या टीमला डेटा मिळत नाहीये, अशी माहिती टीमने दिली आहे. युक्रेनच्या या प्रकल्पात रशियन देखरेखीखाली काम करणार्‍या कर्मचार्‍यांसाठी युएनने चिंता व्यक्त केली आहे. २४ फेब्रुवारी रोजी, रशियाने युक्रेनवर आक्रमण केले आणि प्लांट ताब्यात घेतला होता.

आतापर्यंतच्या युद्धात १२ हजारहून अधिक रशियन सैनिक मारले गेल्याचा दावा युक्रेनच्या लष्कराने केला आहे.

युक्रेनमधून मुलांना बाहेर काढणे हे स्वयंघोषित 'न्यू इंडिया'ची शक्ती दर्शवते. भारत सरकारने २०१४पूर्वी कोणताही गाजावाजा न करता २०११मध्ये १५ हजारहून अधिक भारतीयांना लिबियातून, २००६ मध्ये २३०० जणांना लेबनॉनमधून आणि १९९० मध्ये आखाती देशांमधून जवळपास १ लाख ७० हजार भारतीयांना बाहेर काढले होते. त्यावेळी मंत्र्यांच्या पातळीवरचा कोणताही तमाशा, नाटक नव्हते, अशी टीका काँग्रेस नेते जयराम रमेश यांनी केली आहे.

राष्ट्राध्यक्ष व्लादिमीर पुतिन यांनी त्यांच्या राष्ट्राविरुद्ध विशेष लष्करी कारवाईचे आदेश दिल्यानंतर युक्रेनचे अध्यक्ष वोलोडिमिर झेलेन्स्की यांनी ब्रिटीश खासदारांना रशियाला दहशतवादी राष्ट्र म्हणून घोषित करण्याचे आवाहन केले. तसेच युक्रेनची हवाई हद्द सुरक्षित ठेवण्याची खात्री करण्यासाठी मॉस्कोवर कठोर निर्बंध घालण्याचे आवाहन केले. झेलेन्स्की यांनी मंगळवारी ब्रिटनच्या संसदेला संबोधित केले.

बुधवारी सकाळी किव्ह आणि आसपासच्या परिसरात एअर अलर्ट घोषित करण्यात आला. रहिवाशांना शक्य तितक्या लवकर बंकरमध्ये आश्रय घेण्याचे आवाहन करण्यात आले.

अमेरिकेचे राष्ट्राध्यक्ष जो बायडेन यांनी रशियन तेलाच्या आयातीवर बंदी घातली आहे. अमेरिकेच्या या निर्णयानंतर तेलाच्या किमती प्रति बॅरल १२७ डॉलरवर पोहोचल्या आहेत.

युक्रेन आणि संयुक्त राष्ट्रांनी असा अंदाज लावला आहे की, या लढाईत हजारो रशियन सैन्य आणि नागरिक मारले गेले आणि बरेच जण जखमी झाले. युनायटेड नेशन्सच्या मानवाधिकार कार्यालयाने सांगितले की त्यांनी युक्रेनमध्ये आतापर्यंत १३३५ जणांच्या मृत्यूची पुष्टी केली आहे. परंतु खरा आकडा जास्त असण्याची शक्यता आहे.