Russia Ukraine Conflict News: रशिया आणि युक्रेनमधील वाद चर्चेच्या माध्यमातून मिटवण्यासाठी प्रयत्न सुरु असतानाच रशियाचे राष्ट्राध्यक्ष व्लादिमिर पुतिन यांनी युक्रेनमध्ये लष्करी कारवाई करण्याची घोषणा केली. रशियाने युक्रेनमध्ये घुसखोरी केली असून युद्धाला सुरुवात झाली आहे. युक्रेन आणि रशियामधील युद्ध टाळलं जाऊ शकत नाही असं पुतिन म्हणाले आहेत. पुतिन यांनी रशिया विशेष लष्करी ऑपरेशनला सुरुवात करणार सांगतना या लष्करी कारवाईमधून युक्रेनचे असैनिकीकरण करण्याचा प्रयत्न असेल असंही सांगितलं. यावेळी त्यांनी युक्रेनच्या लष्कराला शस्त्र खाली ठेवा आणि आपल्या घऱी निघून जा असंही सांगितलं. इतकंच नाही तर अमेरिकेसह इतर युरोपला मधे पडल्यास गंभीर परिणाम भोगावे लागतील असा इशारा दिला.

दरम्यान अमेरिकेने रशियाच्या निर्णयाचा विरोध केला असून गंभीर परिणाम भोगावे लागतील असा इशारा दिला असून आणखी निर्बंध लावले जातील असं स्पष्ट केलं आहे. तर संयुक्त राष्ट्राने रशियाला शांतता ठेवण्यासाठी आवाहन केलं आहे. दुसरीकडे भारतानेही भारताने रशिया आणि युक्रेनमधील तणाव कमी करण्यासाठी आवाहन केलं असून मोठं संकट निर्माण होऊ शकतं असा इशारा दिला आहे. युक्रेनने युद्ध थांबवण्यासाठी संयुक्त राष्ट्राकडे विनंती केली असून देशात मार्शल लॉ लागू केला आहे.

Live Updates

Russia Ukraine War: पुतिन यांनी अमेरिकेसह युरोपला मधे पडाल तर वाईट परिणाम भोगावे लागतील असा धमकीवजा इशाराच दिला आहे.

19:30 (IST) 24 Feb 2022
रशिया-युक्रेन युद्धाच्या पार्श्वभूमीवर पंतप्रधान मोदींच्या उपस्थितीत दिल्लीत महत्त्वाची बैठक

रशिया-युक्रेन युद्धाच्या पार्श्वभूमीवर दिल्लीत पंतप्रधान मोदींच्या उपस्थितीत महत्त्वाची बैठक, संरक्षण मंत्री, गृहमंत्री आणि अर्थमंत्रीही उपस्थित

17:34 (IST) 24 Feb 2022
“बॉम्ब शेल्टरमध्ये आसरा घ्या”, युक्रेनमध्ये भारतीय दूतावासाच्या सूचना

“गरज असल्याशिवाय घर सोडू नका, बाहेर जात असताना कागदपत्रे सोबत ठेवा, बॉम्ब शेल्टरमध्ये आसरा घ्या”, युक्रेनमधील भारतीयांना भारतीय दूतावासाच्या सूचना

17:31 (IST) 24 Feb 2022
“हे मीम नाही, तर सध्याचं आमचं आणि तुमचं वास्तव आहे”

“हे मीम नाही, तर सध्याचं आमचं आणि तुमचं वास्तव आहे”, मीम ट्वीट करत युक्रेनचा रशियाला टोला.

16:00 (IST) 24 Feb 2022
“रशियाने नाझी जर्मनीप्रमाणे हल्ला केलाय”

युक्रेनचे राष्ट्राध्यक्ष वोलोडिमिर झेलेन्स्की यांनी रशियाने नाझी जर्मनीप्रमाणे हल्ला केल्याचं म्हटलं असून काही झालं तर आपलं स्वातंत्र्य हिरावू देणार नसल्याचं सांगितलं आहे. “रशियाने विश्वासघातकीपणे सकाळी हल्ला केला, ज्याप्रमाणे नाझी जर्मनीप्रमाणे दुसऱ्या महायुद्धात केला होता. सध्याच्या घडीला आपले देश जागतिक इतिहासाच्या वेगवेगळ्या दिशेला आहेत. रशियाने दृष्ट मार्गाची निवड केली असताना युक्रेन आपलं रक्षण करत असून मॉस्कोला काही वाटत असलं तरी आपलं स्वातंत्र्य देणार नाही,” असं ते म्हणाले आहेत.

यावेळी त्यांनी नागरिकांना आपलं घरं आणि शहर वाचवण्यासाठी तयार राहा असं आवाहनही केलं आहे.

15:52 (IST) 24 Feb 2022
युक्रेनने रशियाशी राजनैतिक संबंध तोडले

युक्रेनने रशियासोबत सर्व राजनैतिक संबंध तोडले असल्याची घोषणा युक्रेनचे राष्ट्राध्यक्ष वोलोडिमिर झेलेन्स्की यांनी ट्विटरवरुन केली आहे. यावेळी त्यांनी रशियातील नागरिकांना युद्ध पुकारल्याविरोधात निषेध करण्याचंही आवाहन केलं आहे. “रशियातील ज्यांनी अद्याप आपला विवेक गमावला नाही त्यांनी बाहेर पडावं आणि युक्रेनविरोधात पुकारलेल्या युद्धाचा निषेध करावा,” असं ट्वीट त्यांनी केलं आहे.

15:38 (IST) 24 Feb 2022
रशियाने ‘आक्रमण’ केल्याचा उल्लेख करण्यावर चीनचा आक्षेप

चीनने युक्रेनमधील परिस्थितीवर भाष्य करताना सर्वांना संयम बाळगण्याचं आवाहन केलं आहे. तसंच रशियाच्या कृतीचे आक्रमण म्हणून विदेशी पत्रकाराकडून करण्याक आलेल्या उल्लेखावर आक्षेप घेतला आहे. परराष्ट्र मंत्रालयाच्या प्रवक्त्या हुआ चुनयिंग यांनी नियमित पत्रकार परिषदेत बोलताना हे भाष्या केलं.

15:23 (IST) 24 Feb 2022
रशिया-युक्रेन युद्धाचा भारताला मोठा फटका, शेअर बाजारावर परिणाम

रशिया-युक्रेन युद्धाचा भारतीय बाजारावर मोठा परिणाम होताना दिसत असून सेन्सेक्समध्ये २ हजार ६०० अकांची पडझड झाली आहे. तर निफ्टी ८०० अंकांनी कोसळला आहे.

15:13 (IST) 24 Feb 2022
युक्रेनच्या राजधानीत शहर सोडण्यासाठी वाहनांच्या रांगा

रशियाकडून युक्रेनमध्ये लष्करी कारवाई सुरु होताच युक्रेनमधील नागरिक राजधानी कीव सोडून बाहेर पडत असून रस्त्यांवर वाहनांच्या रांगा लागल्या होत्या.

15:10 (IST) 24 Feb 2022
मॉस्को स्टॉक एक्स्चेंजमध्ये घसरण सुरुच

युद्ध पुकारल्यामुळे मॉस्को स्टॉक एक्स्जेंमधील घसरण सुरुच असून ४५ टक्क्यांपर्यंत पोहोचली आहे.

14:55 (IST) 24 Feb 2022
रशियाचे ५० जवान ठार, अजून एक विमान पाडलं; युक्रेनचा दावा

युक्रेनच्या लष्कराने Shchastya प्रांत आपल्या ताब्यात आला असून रशियाच्या ५० जवानांना ठार केल्याचा दावा केला आहे. तसंच रशियाचं आणखी एक विमान पाडल्याचंही सांगितलं आहे. म्हणजे आतापर्यंत रशियाची सहा विमानं पाडण्यात युक्रेनला यश आलं आहे.

14:29 (IST) 24 Feb 2022
पंतप्रधान मोदींनी मध्यस्थी करावी, युक्रेनची भारताकडे विनंती

युक्रेनचे भारतातील राजदूत पंतप्रधान नरेंद्र मोदींनी मध्यस्थी करावी यासाठी विनंती करणार आहे. “भारताच रशियासोबत चांगले संबंध असून नवी दिल्ली परिस्थिती नियंत्रणात आणण्यात महत्वाची भूमिका निभाऊ शकतं. आम्ही पंतप्रधान नरेंद्र मोदींना तात्काळ रशियाचे राष्ट्राध्यक्ष पुतिन तसंच आमचे राष्ट्राध्यक्ष वोलोडिमिर झेलेन्स्की यांच्यासोबत संपर्क साधण्याची विनंती करतो,” असं ते म्हणाले आहेत.

“पहाटे ५ वाजता हा निंदनीय हल्ला सुरु झाला आहे. अनेक युक्रेनियन एरोड्रोम, लष्करी विमानतळ, लष्करी विमानतळं, लष्करी व्यवस्थापनं यंच्यावर बॉम्ब आणि क्षेपणास्त्र हल्ले झाले आहेत,” असं भारतातील युक्रेनचे राजदूत इगोर पोलिखा यांनी सांगितलं आहे.

14:25 (IST) 24 Feb 2022
हवाईतळ उद्ध्वस्त केल्याचा रशियाचा दावा युक्रेनने फेटाळला

हवाईतळ उद्ध्वस्त केल्याचा रशियाचा दावा युक्रेनने फेटाळला आहे. तसेच रशियाचा हा दावा खोटा असल्याचं युक्रेनने म्हटलं.

14:23 (IST) 24 Feb 2022
युक्रेन बँकेकडून ग्राहकांवर नवे निर्बंध

युक्रेन बँकेकडून ग्राहकांवर नवे निर्बंध लादण्यात आले आहेत. युक्रेन सेंट्रल बँकेचे गव्हर्नर यांनी दिलेल्या माहितीनुसार, ग्राहकांना दिवसाला आता केवळ १ लाख हरिनिया (युक्रेनियन चलन) इतकेच पैसे काढता येतील.

13:28 (IST) 24 Feb 2022
युरोपियन कमिशन रशियावर लावणार नवे निर्बंध

युरोपियन कमिशनने रशियाविरोधात आणखी काही नवे निर्बंध लावण्याचा निर्णय घेतला आहे.

13:23 (IST) 24 Feb 2022
मॉस्कोमध्ये शेअर बाजार घसरला

युद्धाच्या पार्श्वभूमीवर मॉस्कोमध्ये शेअर बाजार २९ टक्क्यांनी घसरला आहे.

13:18 (IST) 24 Feb 2022
रशियाने केलेल्या हल्ल्यात युक्रेनच्या सात नागरिकांचा मृत्यू

रॉयटर्सच्या वृत्तानुसार, रशियाने केलेल्या हल्ल्यात सात नागरिकांचा मृत्यू झाला असून नऊ जण जखमी झाले असल्याची माहिती युक्रेनने दिली आहे.

13:14 (IST) 24 Feb 2022
भारताने रशियाला थांबण्यास सांगितलं पाहिजे – शशी थरुर

रशियन सैन्याने युक्रेनवर आक्रमण सुरू केलं असताना कॉंग्रेसचे ज्येष्ठ नेते शशी थरूर यांनी मॉस्कोच्या सुरक्षा चिंतेचे कितीही कौतुक केले जात असले तरी युद्धाचा अवलंब करणं किंवा समर्थन करणं अशक्य आहे. भारताने रशियाला थांबण्यास सांगितलं पाहिजे असं म्हटलं आहे.

शशी थरुर यांनी रशिया दौऱ्यावर असणाऱ्या पाकिस्तानच्या पंतप्रधानांनाही खडे बोल सुनावले आहेत. यावेळी त्यांनी इम्रान खान यांनी माजी पंतप्रधान अटलबिहारी वाजपेयी यांची आठवण करुन दिली आहे. १९७९ मध्ये वाजपेयी परराष्ट्र मंत्री असताना चीनने व्हिएतनामवर हल्ला केल्यानंतर त्यांनी दौरा रद्द केला होता अशी आठवण त्यांनी करुन दिली आहे.

13:06 (IST) 24 Feb 2022
युक्रेनधील Ivano-Frankivsk मध्ये क्षेपणास्त्र हल्ला

रशियाने युक्रेनच्या Ivano-Frankivsk मध्ये क्षेपणास्त्र हल्ला केला आहे

12:59 (IST) 24 Feb 2022
रशियाने युद्ध पुकारलं असतानाच इम्रान खान मॉस्को दौऱ्यावर; जगभरात चर्चा

पाकिस्तानचे पंतप्रधान इम्रान खान दोन दिवसांच्या मॉस्को दौऱ्यावर आहेत. एकीकडे पुतिन यांनी युद्धाची घोषणा केली असताना दुसरीकडे इम्रान खान यांचा दौरा असल्याने जागतिक पातळीवर चर्चा सुरु आहे. रशियाने युक्रेनमधील दोन प्रांतांना राष्ट्र म्हणून मान्यता तसंच युद्धाची घोषणा केल्यानंतर तिथे दौरा करणारे ते पहिलेच नेते ठरले आहेत. नवाज शरीफ यांनी १९९९ मध्ये केलेल्या दौऱ्यानंतर ते पहिलेच पंतप्रधान ठरले आहेत.

12:51 (IST) 24 Feb 2022
“पुतीन यांनी हल्ला केलाय, पण आम्ही पळून जाणार नाही”

युक्रेनच्या परराष्ट्रमंत्र्यांनी रशियाने हल्ला केला असताना ट्विटरच्या माध्यमातून नागरिकांना आश्वासन दिलं आहे. “पुतीन यांनी हल्ला केला असला तरी कोणीही पळून जाणार नाही. लष्कर, राजकारणी प्रत्येकजण काम करत आहे. युक्रेन आपली रक्षा करणार,” असं ते म्हणाले आहेत.

12:38 (IST) 24 Feb 2022
युक्रेन लष्कराच्या कमांड सेंटर्सवर क्षेपणास्त्र हल्ला

कीव आणि खार्कीव येथील लष्कराच्या कमांड सेंटर्सवर रशियाने क्षेपणास्त्र हल्ला केल्याचं वृत्त Ukrainska Pravda या वेबसाईटने युक्रेनच्या नेत्याच्या हवाल्याने दिलं आहे.

12:36 (IST) 24 Feb 2022
नरकात तुमचं स्वागत आहे, युक्रेनच्या खासदाराचा रशियाला इशारा

युक्रेनचे खासदार Volodymyr Ariev यांनी इंडिया टुडेशी बोलताना रशियाने केलेल्या घुसखोरीला आपला देश योग्य उत्तर देईल असं म्हटलं आहे. नरकात तुमचं स्वागत आहे असंही ते रशियाला म्हणाले आहेत.

12:29 (IST) 24 Feb 2022
रशियाने दोन गावं घेतली ताब्यात

रॉयटर्सने दिलेल्या वृत्तानुसार, रशियाने पूर्व युक्रेनमधील दोन गावं ताब्यात घेतली आहेत.

12:27 (IST) 24 Feb 2022
रशियाचा हवाई हल्ल्यातून अपार्टमेंट कॉम्प्लेक्सवर निशाणा

रशियाने Kharkiv येथील अपार्टमेंट कॉम्प्लेक्सवर हल्ला केला असून यामध्ये अनेकांचा मृत्यू झाल्याची प्राथमिक माहिती आहे.

12:25 (IST) 24 Feb 2022
रशियन क्रूझ क्षेपणास्त्र कीववर पडलं

रशियन क्रूझ क्षेपणास्त्र कीववर पडलं

12:24 (IST) 24 Feb 2022
भारतीय दुतावासाचं युक्रेनमधील नागरिकांना आवाहन

युक्रेनमधील भारतीय दुतावासाने देशात अडकलेल्या भारतीय नागरिकांना संयम बाळगण्याचं आवाहन केलं आहे. कीवच्या दिशेने प्रवास करणाऱ्यांना आपापल्या शहरांमध्ये परतण्यास सांगण्यात आलं आहे.

12:19 (IST) 24 Feb 2022
युक्रेनमधील २५ शहरांवर रशियाने एकाच वेळी केली हल्ला; युक्रेनचा ‘तो’ दावाही फेटाळला

आमच्या देशातील शांततापूर्ण शहरांवर रशिया सध्या सर्व बाजूंनी हल्ले करत आहे, असं युक्रेनच्या परराष्ट्र मंत्रालयाने म्हटलंय. तर रशियाने आम्ही केवळ लष्करी तळांवर हवाई हल्ले करत असल्याचा दावा केलाय.

सविस्तर बातमी वाचवण्यासाठी

12:18 (IST) 24 Feb 2022
रशियाने केलेल्या हल्ल्यात शेकडो जणांचा मृत्यू

रशियाच्या हल्ल्यात शेकडो सेवा सदस्यांचा मृत्यू झाल्याचं युक्रेनच्या अधिकाऱ्याने Wall Street Journal शी बोलताना सांगितलं आहे.

12:15 (IST) 24 Feb 2022
रशियाच्या क्षेपणास्त्रांचा युक्रेनच्या पायाभूत सुविधा, सीमा सुरक्षेवर हल्ला

युक्रेनच्या राष्ट्राध्यक्षांनी दिलेल्या माहितीनुसार, रशियाने क्षेपणास्त्रांचा वापर करत पायाभूत सुविधा, सीमा सुरक्षेवर हल्ला केला आहे. यावेळी त्यांनी मार्शल लॉ लागू करण्यात आला असून अमेरिकेचे राष्ट्राध्यक्ष जो बायडन यांच्यासोबत फोनवरुन चर्चा झाल्याची माहिती दिली आहे. युक्रेनला नष्ट करण्याचा रशियाचा हेतू असल्याचा दावा त्यांच्या परराष्ट्र मंत्रालयाकडून करण्यात आला आहे.

12:12 (IST) 24 Feb 2022
कीवमधील नागरिकांनी अंडग्राऊंड मेट्रो स्थानकांमध्ये घेतला आसरा

रशियाने बॉम्बहल्ले करण्यास सुरुवात केली असल्याने आणि एअर रेड सायरन वाजल्याने युक्रेनमधील नागरिकांमध्ये भीतीचं वातावरण आहे. AFP च्या वृत्तानुसार, राजधानी कीवमधील अनेक नागरिकांनी जीव वाचवण्यासाठी अंडग्राऊंड मेट्रो स्थानकांमध्ये घेतला आसरा घेतला आहे.

रशियाच्या लष्करी बळाचा वापर आपल्या देशाबाहेर करण्याचा अधिकार अध्यक्ष पुतिन यांना मिळाल्यानंतर आणि पाश्चिमात्य देशांनी अनेक निर्बंध लादून त्याला प्रत्युत्तर दिल्यानंतर तणाव नाटय़मयरीत्या वाढला होता. यानंतर, युक्रेनने आपल्या नागरिकांना रशिया सोडण्याचे आवाहन केले होते. युरोपनेही बुधवारी आणखी संघर्षांची तयारी केली होती. गेले अनेक आठवडे शांतता असल्याचे दर्शवल्यानंतर युक्रेनच्या अधिकाऱ्यांनी बुधवारी वाढती चिंता व्यक्त केली. परराष्ट्र मंत्रालयाने आपल्या नागरिकांना रशियात न जाण्याचा सल्ला दिला, तसेच तेथे कुणी असेल तर त्याने तत्काळ तेथून परतावे अशी शिफारस केली.

हे युद्ध थांबवण्यासाठी संयुक्त राष्ट्र प्रयत्न करत असून रशियाला सैन्य मागे घेत शांततेला एक संधी देण्याची विनंती केली आहे.