घटस्थापनेच्या मुहूर्तावर राज्यातील सर्वधर्मीय प्रार्थनास्थळं भक्तांसाठी खुली करण्याचा निर्णय राज्य सरकारने घेतला आहे. मात्र, करोनाचा धोका कायम असल्याने संबंधित सर्व नियमांचं काटेकोरपणे पालन होणं अत्यंत आवश्यक आहे. याच पार्श्वभूमीवर, आज (५ ऑक्टोबर) शिर्डी साई संस्थानाने नवी नियमावली जाहीर केली आहे. राज्य सरकारच्या निर्णयानुसार, येत्या ७ ऑक्टोबरपासून शिर्डीचं साईमंदिर देखील भाविकांसाठी खुलं होणार आहे. मात्र, काही नियम यावेळी लागू असतील. शिर्डी साई संस्थानाच्या नियमावलीनुसार, दररोज १५ हजार भाविकांनाच दर्शन घेता येणार आहे. त्याचसोबत, दर्शनासाठी जाताना आता भाविकांना हार-प्रसाद घेऊन जाता येणार नसल्याचंही स्पष्ट करण्यात आलं आहे.
साई संस्थानाने आज पत्रकार परिषद घेऊन ही नियमावली जाहीर केली आहे. या नियमावलीनुसार, दररोज १५ हजार भाविकांना साईमंदिरात प्रवेश मिळणार आहे. म्हणजे दर तासाला जवळपास ११५० भाविक दर्शन घेतील. त्याचप्रमाणे, मंदिरातील काकड आरतीपासून शेजारतीपर्यंत सर्व आरतींसाठी फक्त ९० साईभक्तांना परवानगी असेल. त्यात १० गावकऱ्यांचा आणि अन्य ८० भाविकांचा समावेश असेल. मुख्य म्हणजे १० वर्षांखालील मुलांना, ६५ वर्षांवरील नागरिकांना आणि गरोदर महिलांना मंदिरात प्रवेश करण्यास मनाई असेल.
शिर्डी साई संस्थानाची नियमावली
- दररोज फक्त १५ हजार भाविकांनाच दर्शन
- हार-प्रसाद घेऊन जाता येणार नाही
- १० वर्षांखालील मुलांना, ६५ वर्षांवरील ज्येष्ठ नागरिकांना आणि गरोदर महिलांना प्रवेश नाही
- आरतीसाठी फक्त १० गावकऱ्यांना प्रवेश
पत्रकार परिषदेत शिर्डी साई संस्थानाने दिलेल्या माहितीनुसार, संस्थानाचं भक्तनिवास आणि प्रसादालय देखील भाविकांसाठी सुरु होणार आहे.
