समाजवादी पक्षाची खळखळ, पण सरकार स्थिर

‘सरकारला धोका नाही’
दुसरीकडे सोनिया गांधी यांचे राजकीय सचिव अहमद पटेल यांनी जनता दल संयुक्तचे अध्यक्ष शरद यादव यांची भेट घेतली.
बसपाच्या सर्वेसर्वा मायावती यांनी सरकारला आपला पाठिंबा कायम असेल, असे स्पष्ट केले. तृणमूल काँग्रेसच्या ममता बनर्जी यांनीही विदेशी धोरणावर आपला पक्ष सरकारचे समर्थन करेल, असे संकेत दिले.  हे सरकार आपल्या अंतर्कलहाने गडगडेल, असे सांगून भाजपनेही सरकारविरुद्ध अविश्वास प्रस्ताव मांडण्यात स्वारस्य दाखविलेले नाही. समजा अविश्वास प्रस्ताव आलाच तर द्रमुक सरकारच्या विरोधात मतदान करणार नाही, असे आश्वासन काँग्रेसच्या ज्येष्ठ नेत्यांनी करुणानिधींकडून मिळविल्याचे समजते. त्यामुळे सरकारला कोणताही धोका नाही, असे ठाम वक्तव्य पत्रकार परिषदेत चिदंबरम, कमलनाथ आणि तिवारी यांना करणे शक्य झाले.

समाजवादी-भाजपचे अहो रुपम..
भाजप आणि समाजवादी पक्षाच्या ज्येष्ठ नेत्यांनी एकमेकांच्या सर्वोच्च नेत्यांची प्रशंसा करीत अप्रत्यक्षपणे ‘जवळीकी’चे संकेत दिले. माजी पंतप्रधान अटलबिहारी वाजपेयी सर्वांना सोबत घेऊन सरकार चालवायचे. पण तसे करण्यात मनमोहन सिंग अपयशी ठरत असल्याची टीका मुलायमसिंह यादव यांचे बंधू व राज्यसभेतील सपाचे गटनेते प्रा. रामगोपाल यादव यांनी केली.
विरोधी पक्षनेत्या सुषमा स्वराज यांनी मुलायमसिंह यादव यांच्याविषयी अनुद्गार काढणाऱ्या बेनीप्रसाद वर्मा यांनी विशेषाधिकाराचे हनन केल्याचा आरोप केला.

मुलायम-पवार भेट
मुलायमसिंह यादव यांनी केंद्रीय कृषी मंत्री शरद पवार यांची भेट घेतली. शरद पवार यांनीही यूपीए सरकारमधून बाहेर पडावे, असा या भेटीमागचा उद्देश असल्याचे बोलले जात आहे. निदान तसा देखावा निर्माण करण्याचा प्रयत्न मुलायमसिंह यादव यांनी पवार यांची भेट घेऊन केला. ही तिसऱ्या आघाडीची मोर्चेबांधणी असल्याचा दावा मुलायमसिंह यांचे कट्टर समर्थक समजल्या जाणाऱ्या सपाच्या एका ज्येष्ठ खासदाराने केला.