काही दिवसांपूर्वी पंतप्रधान नरेंद्र मोदी यांनी लक्षद्वीपला भेट दिली होती. यावर मालदीवच्या तीन मंत्र्यांनी पंतप्रधान मोदी यांच्याबद्दल ‘एक्स’ ( ट्वीटर ) अपमानास्पद शेरेबाजी केली होती. यानंतर देशभरातून तीव्र प्रतिक्रिया उमटत आहेत. यावर शिवसेना ( ठाकरे गट ) खासदार संजय राऊत यांनीही भाष्य केलं आहे. महान देशाच्या पंतप्रधानांबद्दल दुसऱ्या देशातील मंत्र्यांनी चुकीचे शब्द वापरणं नागरिकांना अजिबात मान्य नाही. पण, भाजपानं याचा वापर राजकारणासाठी करून दिवे लावण्यास सुरूवात केली आहे, अशी टीका संजय राऊतांनी केली.
दिल्लीत प्रसारमाध्यमांशी संवाद साधताना संजय राऊत म्हणाले, “मालदीवची घडामोडी आंतररराष्ट्रीय असल्याचं मी मानत नाही. देशाच्या पंतप्रधानांबाबत अपशब्द वापरणाऱ्यांच्या विरोधात आम्ही आहोत. राजकीय व्यक्ती म्हणून मोदींवर आम्ही टीका-टीप्पणी करतो. पण, मोदी या महान देशाचे पंतप्रधान आहेत.”
“भाजपानं राजकीय दिवे लावले”
“महान देशाच्या पंतप्रधानांबद्दल दुसऱ्या देशाच्या मंत्र्यांनी काही चुकीचे शब्द वापरणे नागरिकांना अजिबात मान्य नाही. पण, भाजपानं याचा वापर राजकारणासाठी करून दिवे लावण्यास सुरूवात केली आहे. यावरून वाटतं लक्षद्वीपची एकमेव जागा जिंकण्यासाठी हे पूर्वनियोजीत तर नव्हतं ना?” अशी शंका संजय राऊतांनी उपस्थित केली आहे.
“मालदीव फार लहान देश आहे”
“पंतप्रधान मोदींबाबत मालदीवच्या मंत्र्यांनी केलेल्या टीप्पणीचा आम्ही धिक्कार करतो. हा काय आंतरराष्ट्रीय विषय असण्याचा भाग नाही. तसेच, यामुळे जागतिक युद्ध वगैरे होणार आहे, असंही नाही. मालदीव फार लहान देश आहे. तेथे गवताची पाती सुद्धा उगवत नाही. समुद्राच्या बेटांचा समूह असलेल्या मालदीवची लोकसंख्या तीन ते चार लाखच आहे,” असं संजय राऊतांनी सांगितलं.