न्यूक्लियर कचऱ्यावरुन सौदी-कतारमध्ये पडणार सैन्य संघर्षाची ठिणगी ?

सौदी अरेबिया, संयुक्त अरब अमिराती, इजिप्त आणि बहरीन या चार देशांचा कतारला तीव्र विरोध आहे. हे चारही देश कतारवर दहशतवादाला पाठिंबा देत असल्याचा आरोप करत असून आखातामधील इस्लामविरोधी शक्तिंना मदत करण्याचा ठपका कतारवर ठेवण्यात आला आहे. कतारची इराणबरोबर वाढलेली जवळीकही आखातामधील अनेक देशांना पटलेली नाही.

समुद्र सीमेजवळ अण्विक कचरा टाकण्यासाठी कालवा बांधणे म्हणजे आमच्या सार्वभौमत्वाला धोक्यात घालण्याचा हा प्रयत्न आहे असे कतारतने म्हटले आहे. कतारवर शासन करणारे सध्याचे राजे शेख तमीम बिन हमाद अल तहानी यांनी सोमवारी वॉशिंग्टनमध्ये अमेरिकेच्या संरक्षण मंत्र्यांची भेट घेतली. आज ते राष्ट्राध्यक्ष डोनाल्ड ट्रम्प यांना भेटणार आहेत.

सौदी अरेबिया कतारला लागून असणाऱ्या सीमेवर लष्करी तळ उभारण्याचा विचार करत आहे. तिथेच दुसऱ्या बाजूला अणूभट्टीमधील अण्विक कचरा टाकण्यासाठी कालवा बांधण्याची योजना आहे असे साबक आणि अल रियाध या वर्तमानपत्रांनी म्हटले आहे.