शेअर बाजारात पडझड, सकाळच्या सत्रात सेन्सेक्समध्ये १००० अंकांची घसरण

शेअर बाजार उघडताच घसरणीला सुरुवात झाली आहे. सकाळच्या सत्रात सेन्सेक्स आणि निफ्टीत मोठी घसरण दिसून आली. गुरूवारच्या ट्रेडिंग सत्रात शेअर बाजाराची सुरुवात लाल चिन्हाने झाली. सुरुवातीच्या व्यवहारात सेन्सेक्स १००० अंकांपर्यंत घसरला. दुसरीकडे, निफ्टीलाही २५० अंकांपर्यंत फटका बसला. सकाळी १० वाजता सेन्सेक्स ८५७.३५ अंकांनी म्हणजेच १.५९ टक्क्यांनी घसरून ५३,२३१.०४ अंकांच्या स्तरावर व्यवहार करत होता. तर निफ्टी २६६.८० अंकांनी म्हणजेच १.६५ टक्क्यांनी घसरून १५,९००.३० या स्तरावर होता. दुसरीकडे, अमेरिकन चलनाच्या तुलनेत रुपयाने गुरुवारी पुन्हा नवीन विक्रमी नीचांकी गाठला. रुपया सुरुवातीच्या व्यापारात ३० पैशांनी घसरून ७७.५५ वर आला.