गुलाम अलींच्या कार्यक्रमाला विरोध करणारे शिवसैनिक पोलिसांच्या ताब्यात

गुजरातमधील भावनगर जिल्ह्यात आयोजित करण्यात आलेल्या ज्येष्ठ गझलगायक गुलाम अली यांच्या कार्यक्रमाला विरोध करणाऱया शिवसैनिकांना स्थानिक पोलिसांनी ताब्यात घेतले आहे.
मोरारी बापू संघटनेच्या वतीने गुलाम अली यांना पुरस्कार वितरण सोहळा गुजरातच्या भावनगरमधील महुवा येथे आयोजित करण्यात आला होता. कार्यक्रमाच्या ठिकाणी शिवसैनिकांच्या गटाने गुलाम अलींच्या विरोधात घोषणाबाजी करत मोर्चा काढला. याप्रकरणी पोलिसांनी कार्यक्रमस्थळावरून दहा शिवसैनिकांना ताब्यात घेतले.
कार्यक्रमाच्या ठिकाणी घोषणाबाजी आणि परिस्थिती नियंत्रणाबाहेर जात असल्याचे लक्षात आल्याने शुक्रवारी सकाळी अकराच्या सुमारास दहा जणांना ताब्यात घेण्यात आले होते. कार्यक्रम सुरळीत पार पडल्यानंतर दीड वाजता त्यांना सोडण्यात आले, असे महुवा पोलीस ठाण्याचे अधिकारी वनराज मांजरिया यांनी सांगितले.