येत्या १८ जुलै रोजी राष्ट्रपतीपदासाठी निवडणूक होत आहे. ही निवडणूक जिंकण्यासाठी विरोधी पक्ष तसेच सत्ताधारी पुरस्कृत उमेदवार समर्थनासाठी देशभर दौरे करत आहेत. असे असताना येत्या ६ ऑगस्ट रोजी होणाऱ्या उपराष्ट्रपतीपदाच्या निवडणुकासाठी संयुक्त पुरोगामी आघाडी (यूपीए) आणि राष्ट्रीय लोकशाही आघाडी (एनडीए) पुरस्कृत उमेदवारांची घोषणा करण्यात आली आहे. राष्ट्रपतीपदाच्या निवडणुकीसाठी शिवसेनेने एनडीएच्या उमेदवार द्रौपदी मुर्मू यांना पाठिंबा दिला आहे. या निर्णयानंतर उपराष्ट्रपतीपदाच्या निवडणुकीसाठी शिवसेना कोणाला पाठिंबा देणार, याकडे सर्वांचेच लक्ष लागले आहे. असे असताना शिवसेनेचे खासदार संजय राऊत यांनी यावर प्रतिक्रिया दिली आहे. मार्गारेट आल्वा यांच्या नावावर सर्वांचे एकमत आहे. त्या अनुभवी नेत्या आहेत. आम्ही त्यांच्या पाठीशी राहू, असे संजय राऊत म्हणाले. तसे वृत्त एबीपी माझाने दिले आहे.
“आजच्या बैठकीला १७ पक्ष होते. पश्चिम बंगालच्या मुख्यमंत्री ममता बॅनर्जी आणि दिल्लीचे मुख्यमंत्री अरविंद केजरीवाल यांच्याशी चर्चा झालेली आहे. सर्वांचे मार्गारेट अल्वा यांच्या नावावर एकमत आहे. त्या अनुभवी नेत्या आहेत. आम्ही त्यांच्या पाठिशी उभे राहू” असे संजय राऊत म्हणाले.
हेही वाचा >> Ukraine War: सनफ्लॉवर ऑइलच्या बदल्यात बीअर; तेलटंचाईवर मात करण्यासाठी जर्मनीमधल्या पब्जची शक्कल
आज दुपारी शरद पवार यांच्या दिल्लीतील निवासस्थानी भाजपा विरोधी पक्षांच्या नेत्यांची बैठक झाली. या बैठकीला एकूण १७ पक्षांचे नेते उपस्थित होते. या बैठकीत अल्वा यांच्या नावावर शिक्कामोर्तब करण्यात आले. आल्वा केंद्र सरकारमध्ये मंत्री होत्या, गव्हर्नर म्हणून देखील त्यांनी कारभार पाहिला आहे. त्या राज्यसभा सदस्य होत्या. आम्ही काही नावांवर चर्चा केली आणि शेवटी एकमताने मार्गरेट अल्वा यांच्या नावावर शिक्कामोर्तब केलं आहे, अशी माहिती शरद पवार यांनी ही बैठक संपल्यानंतर दिली.
हेही वाचा >> मथुरा: कचरा गाडीत योगी आदित्यनाथ, नरेंद्र मोदींचे फोटो, सफाई कर्मचाऱ्यानं गमावली नोकरी
दरम्यान, देशाच्या १६ व्या उपराष्ट्रपतीपदाची निवडणूक ६ ऑगस्टला होणार आहे. तर १९ जुलै ही उमेदवारी अर्ज भरण्याची शेवटची तारीख आहे. विद्यमान उपराष्ट्रपती व्यंकय्या नायडू यांचा कार्यकाळ येत्या १० ऑगस्ट रोजी समाप्त होणार आहे.
