गोव्यात स्मृती इराणींच्या कन्येचे अवैध मद्यालय : काँग्रेसचा आरोप

काँग्रेसचे प्रसारमाध्यमे व प्रचारप्रमुख पवन खेरा यांनी  सांगितले, की केंद्रीय मंत्री स्मृती इराणी यांच्या कुटुंबीयांवर भ्रष्टाचाराचे गंभीर आरोप आहेत. गोव्यात इराणी यांच्या कन्येद्वारे चालवल्या जाणाऱ्या उपाहारगृहात मद्यसेवा देण्यासाठी नकली परवाना दिला गेल्याचा आरोप आहे. ही माहिती ‘सूत्रांवर’ विसंबून दिली गेलेली नाही. कुठल्याही संस्थेने अथवा राजकीय सूडबुद्धीने हा आरोप आम्ही करत नाही. तर माहितीच्या अधिकारातून उघड झालेल्या माहितीद्वारे हे स्पष्ट झाले आहे. ‘सिली सोल्स कॅफे अँड बार’साठी इराणी यांच्या कन्येने खोटी कागदपत्रे देऊन मद्यालय परवाना मिळवल्याचे या माहितीद्वारे स्पष्ट होते. खेरा यांनी सांगितले, की २२ जून २०२२ रोजी परवाना नूतनीकरणासाठी ज्या ‘अँथनी डीगामा’ यांच्या नावाने अर्ज केला गेला, त्या व्यक्तीचे मागील वर्षीच निधन झाले आहे. अँथनींच्या आधारकार्डानुसार ते मुंबईच्या विलेपार्लेचे रहिवासी असल्याचे समजते. माहितीच्या अधिकाराद्वारे ही माहिती मिळवणाऱ्या वकिलांना अँथनींचे मृत्यू प्रमाणपत्रही मिळाले आहे. या कागदपत्रांद्वारे असे निदर्शनास येते, की या मद्यालय परवान्यासाठी आवश्यक उपाहारगृहाच्या परवान्याशिवायच मद्यालय परवाना देण्यात आला. पंतप्रधानांनी स्मृती इराणी यांना मंत्रीपदावरून  हटवावे, अशी मागणी खेरा यांनी केली.

स्मृती इराणी यांनी राहुल गांधींवर केलेल्या टीकेबाबत विचारल्यावर खेरा म्हणाले, की वर्तमानपत्र चालवण्याच्या चांगल्या कामाची तुलना गोव्यात अवैध मद्यालय चालवण्याशी होऊ शकत नाही. इराणी यांना माहिती नसताना हा अवैध परवाना मिळाला का, त्यांच्या प्रभावाशिवाय हा परवाना मिळाला नसेल काय?  या मद्यालयापर्यंत प्रसारमाध्यमे पोहोचू नयेत म्हणून गोव्यात या मद्यालयाभोवती खासगी सुरक्षाव्यवस्था तैनात केली आहे. आम्ही आपल्याकडून जाणू इच्छितो, की कुणाच्या प्रभावातून हे होत असावे, या बेकायदा कामामागे कोण असेल? असा प्रतिसवाल खेरा यांनी यावेळी पत्रकारांनाच केला.

न्यायालयासह जनतेच्या न्यायालयातही दाद मागणार : स्मृती इराणी

स्मृती इराणी यांनी म्हटले आहे की, आपली कन्या ही अवघ्या १८ वर्षांची असून महाविद्यालयाच्या पदवी अभ्यासक्रमाच्या प्रथम वर्षांची विद्यार्थिनी आहे. ती गोव्यात कुठलेही मद्यालय चालवत नाही. तिची एवढीच चूक आहे, की तिच्या आईने सोनिया आणि राहुल गांधींनी केलेल्या पाच हजार कोटी रुपयांच्या लुटीसंदर्भात पत्रकार परिषद घेतली. या प्रकरणी मी कायदेशीर मार्गाने न्यायालयात दाद मागेन. तसेच जनतेच्या न्यायालयातही याबाबत आवाज उठवून जनतेकडूनच उत्तर मागेन. राहुल गांधी यांना २०२४ मध्ये अमेठी येथून पुन्हा लोकसभा निवडणूक लढवण्याचे आव्हान मी देते. मी हे खात्रीपूर्वक सांगते, की अमेठीतून राहुल पुन्हा हरतीलच.

‘बिनबुडाच्या आरोपाने बदनामीचा प्रयत्न’

इराणी यांच्या कन्येच्या वकील नागरा यांनी स्पष्ट केले, की स्वार्थी हेतूने काही मंडळी दुर्भावनेतून चुकीचा व अपमानजनक मजकूर समाजमाध्यमांवर प्रसिद्ध करत आहेत. माझ्या अशिलाच्या मातोश्री व प्रतिष्ठित नेत्या स्मृती इराणी यांना राजकीय हेतूने बदनाम करण्याचा हा प्रयत्न आहे. हे आरोप निराधार असून, तपशिलाची शहानिशा न करता बिनबुडाचे आरोप करून सनसनाटीपणा निर्माण करणे, एवढाच यामागचा हेतू आहे. केवळ एका नेत्याची कन्या म्हणून माझ्या अशिलाला बदनाम केले जात असल्याचा प्रत्यारोपही नागरा यांनी केले.