Kumbh Mela 2025 : स्टीव्ह जॉब्सनी वयाच्या १९व्या वर्षी लिहिलेल्या पत्राचा ‘इतक्या’ कोटींना लिलाव, कुंभमेळ्यात जाण्याची व्यक्त केली होती इच्छा

स्टीव्ह जॉब्स यांच्या वाढदिवसाच्या थोडीशी आधीची तारीख असलेल्या या पत्रात, जॉब्स यांनी कुंभमेळ्याला उपस्थित राहण्याची त्यांची इच्छा आपल्या मित्राकडे व्यक्त केली होती. “मला एप्रिलमध्ये सुरू होणाऱ्या कुंभमेळ्यासाठी भारतात जायचे आहे. मी मार्चमध्ये कधीतरी निघणार आहे, अजून निश्चित नाही”, असं त्यांना आपल्या पत्रात लिहिलं आहे.

भारत भेटीवेळी स्टीव्ह जॉब्स हे नीम करोली बाबा यांच्या उत्तराखंड येथील आश्रमात गेले होते. नीम करोली बाबा यांच्या निधनानंतर जॉब्स भारतात आले होते. या भेटीवेळी ते कैंची धाम येथे राहिले होते. या सात महिन्यांच्या कालावधीत जॉब्स यांनी स्वत:ला भारतीय संस्कृती आणि अध्यात्मात बुडवून घेतले होते.

यंदा उत्तर प्रदेशच्या प्रयागराज येथे महा कुंभमेळा होत आहे. हा पूर्ण कुंभ मेळा दर १२ वर्षांनी आयोजित केला जातो. स्टीव्ह जॉब्सच्या पत्नी लॉरेन पॉवेल जॉब्स यादेखील यंदाच्या कुंभ मेळ्यात सहभागी झाल्या होत्या. लॉरेन पॉवेल यांना त्यांचे अध्यात्मिक गुरू कैलाशानंद गिरी यांनी कमला असं नाव दिलं आहे. भारत भेटीदरम्यान अॅलर्जीचा त्रास होत असून देखील लॉरेन यांनी गंगा स्नान विधीत सहभागी होण्याचा निर्णय घेतला होता. त्यांच्या या भारत भेटीची माध्यमांमध्ये चांगलीच चर्चा झाली.

कुंभ मेळा काय असतो?

यंदा उत्तर प्रदेशमधील प्रयागराज येथे महा कुंभाचे आयोजन करण्यात आले आहे. दर १२ वर्षांनी होणाऱ्या या मेळ्याला पूर्ण कुंभ असेही म्हणतात. जगभरातील भाविकांचीा सर्वात मोठा मेळा असतो. यासाठी लाखोंच्या संख्येने भाविक गोळा होतात. या पवित्र कालावधीत नद्यांमध्ये स्नान केल्याने पापांची शुद्धी होते आणि आध्यात्मिक पुण्य मिळते अशी या भाविकांची धारणा असते.

कुंभ मेळ्याची सुरुवातीबद्दल बोलायचे झाल्यास, याची सुरूवात ही पौराणिक कथा, इतिहास आणि श्रद्धा यांच्या मिश्रणात आढळते. हिंदू पौराणिक कथेनुसार देव आणि राक्षस यांनी केलेल्या समुद्र मंथनामधून निघालेले अमृत हे पृथ्वीवर चार ठिकाणी सांडले- हरिद्वार, प्रयागराज, उज्जैन आणि नाशिक-त्र्यंबकेश्वर, जिथे आता हा उत्सव साजरा केला जातो.