गेल्या काही दिवसांत भारताची राजधानी दिल्लीसह आसपासच्या परिसरात सातत्याने भूकंपाचे धक्के जाणवत आहे. शुक्रवारी (३ नोव्हेंबर)मध्यरात्री नेपाळमध्ये ६.४ ‘रिश्टर स्केल’ तीव्रतेचा जोरदार भूकंप झाला. या भूकंपाने दिल्लीसह आसपासच्या परिसरात धक्के जाणवले. भूकंपाची ही घटना ताजी असताना आज पुन्हा एकदा राजधानी दिल्लीत भूकंपाचे तीव्र धक्के जाणवले आहेत.
राष्ट्रीय भूकंप निरीक्षण आणि संशोधन केंद्राने दिलेल्या माहितीनुसार, या भूकंपाचा केंद्रबिंदू नेपाळमध्ये आहे. सोमवारी सायंकाळी ४ वाजून १६ मिनिटांनी नेपाळमध्ये ५.६ रिश्टर स्केल तीव्रतेचा भूकंप झाला. नेपाळमध्ये केंद्रबिंदू असलेल्या या भूकंपामुळे दिल्लीसह आसपासचा परिसर हादरला आहे.
हेही वाचा- नेपाळमध्ये १४० भूकंपबळी सुमारे १५० जण जखमी
भूकंपाचे धक्के जाणवल्यानंतर नागरिकांनी घराबाहेर पळ काढला. अवघ्या एक महिन्यात चौथ्यांदा भूकंपाचे धक्के जाणवल्याने लोकांमध्ये भीतीचं वातावरण पसरलं आहे. या दुर्घटनेत घरांची पडझड झाल्याची अथवा जीवितहानी झाल्याची अद्याप कोणतीही माहिती समोर आली नाही.
