पीटीआय, इस्लामाबाद
पाकिस्तानच्या बलुचिस्तान प्रांतातील रेल्वे स्थानकावर शनिवारी झालेल्या आत्मघातकी बॉम्बस्फोटात १४ सुरक्षा कर्मचाऱ्यांसह किमान २७ लोक ठार आणि ६२ जण जखमी झाले. पेशावरसाठी निघालेली जाफर एक्स्प्रेस पकडण्यासाठी प्रवासी प्रांतीय राजधानी असलेल्या क्वेटाच्या रेल्वे स्थानकात जमले होते, त्या वेळीच हा बॉम्बस्फोट झाला.
हल्लेखोर आत्मघातकी हल्ला करण्याच्या उद्देशाने स्थानकात घुसले. त्यांना रोखणे कठीण होते, असे क्वेटा विभागाचे आयुक्त हमजा शफकत यांनी सांगितले. दरम्यान, मृतांचा आकडा वाढण्याची शक्यता असल्याची माहिती या वेळी पोलीस अधीक्षक (मोहीम) मुहम्मद बलोच यांनी दिली आहे. परिसराची सुरक्षा वाढवली असून जखमी आणि मृतांना सरकारी रुग्णालयात दाखल केल्याचे प्रांतीय सरकारचे प्रवक्ते शाहीद रिंद यांनी सांगितले.
हेही वाचा >>>‘बॉम्ब’चा टोमणा मुलीला महागात पाडला, विमानतळावर उडाली खळबळ; मेटल डिटेक्टरच्या आवाजामुळे गोंधळात भर
‘बीएलए’ने घेतली हल्ल्याची जबाबदारी
बलुच लिबरेशन आर्मी (बीएलए) या बलूच फुटीरतावादी गटाला दहशतवादी संघटना म्हणून घोषित करण्यात आले आहे. या संघटनेने हल्ल्याची जबाबदारी स्वीकारली आहे. पाकिस्तान सरकार बलुचिस्तानच्या संसाधनांचा वापर करून या भागाच्या विकासाकडे दुर्लक्ष करत असल्याचा आरोप बीएलएने केला आहे.
