Crew 10 Mission Of NASA And Spacex: गेल्या नऊ महिन्यांपासून आंतरराष्ट्रीय अंतराळ स्थानकात (ISS) अडकलेल्या अंतराळवीर सुनीता विल्यम्स आणि बुच विल्मोर यांचे पृथ्वीवर परतण्याचे स्वप्न आता पूर्ण होणार आहे. एलोन मस्क यांच्या स्पेसएक्स आणि नासाने मिळून त्यांच्या परतीसाठी क्रू-१० मिशन सुरू केले आहे. नासाच्या केनेडी स्पेस सेंटरमधून फाल्कन ९ रॉकेट वापरून ड्रॅगन अंतराळयान आयएसएसवर पाठवण्यात आले आहे. स्थानिक वेळेनुसार, शुक्रवारी संध्याकाळी ७:०३ वाजता ते प्रक्षेपित करण्यात आले.
सुनीता विल्यम्स आणि बुच विल्मोर गेल्या वर्षी जूनमध्ये बोईंगच्या स्टारलाइनर कॅप्सूलमधून आंतरराष्ट्रीय अंतराळ स्थानकात पोहोचले होते. ते एका छोट्या चाचणी मोहीमेसाठी गेले होते, परंतु हेलियम गळती आणि थ्रस्टरमधील बिघाड यासारख्या तांत्रिक अडचणींमुळे त्यांचे परतणे वारंवार लांबले आहे. त्यानंतर, स्पेसएक्सच्या कॅप्सूलमध्ये बॅटरीच्या समस्येमुळे त्यांचे परतणे आणखी लांबले. अखेर, क्रू-१० मोहिमेद्वारे त्यांना परत आणण्याची योजना आखण्यात आली, ज्यामुळे नासा आणि स्पेसएक्सला दिलासा मिळाला.
क्रू-१० मिशनमध्ये ४ नवे आंतराळवीर
या मोहिमेअंतर्गत, चार नवीन अंतराळवीरांना आंतरराष्ट्रीय अंतराळ स्थानकात पाठवण्यात आले आहे. यामध्ये नासाच्या अ‍ॅन मॅक्क्लेन आणि निकोल आयर्स, जपान एरोस्पेस एक्सप्लोरेशन एजन्सीच्या ताकुया ओनिशी आणि रशियाची अंतराळ संस्था रोसकॉसमॉसचे किरिल पेस्कोव्ह यांचा समावेश आहे. हे नवीन क्रू आयएसएसवरील सध्याच्या क्रूची जागा घेईल, जेणेकरून विल्यम्स आणि विल्मोर पुढील आठवड्यात परत येऊ शकतील. जर हवामान अनुकूल राहिले तर त्यांचे परतणे आणखी लवकर पूर्ण होईल.
पृथ्वीच्या गुरुत्वाकर्षणाशी जुळवून घेण्याचे आव्हान
तज्ज्ञांच्या मते, इतका वेळ अंतराळात राहिल्याने या दोन्ही अंतराळवीरांच्या शरीरावर निश्चितच परिणाम होईल. कारण ते दोघेही बराच काळ पृथ्वीच्या गुरुत्वाकर्षणाच्या बाहेर आहेत. अशा परिस्थितीत, जेव्हा ते परत येतील, तेव्हा त्याच्यासमोरील सर्वात मोठे आव्हान म्हणजे त्याचे शरीर पृथ्वीच्या गुरुत्वाकर्षणाशी जुळवून घेणे हे असणार आहे.
डोनाल्ड ट्रम्प यांच्या सूचना
या मोहिमेपूर्वी, अमेरिकेचे संरक्षण सचिव पीट हेगसेथ यांनी नासा आणि स्पेसएक्स टीमसाठी एका व्हिडिओ मेसेजद्वारे शुभेच्छा दिल्या. ते म्हणाला, “आम्ही तुमच्या सुरक्षिततेसाठी प्रार्थना करत आहोत. तुम्ही लवकरच घरी परत यावे यासाठी उत्सुक आहोत.” फॉक्स न्यूजच्या वृत्तानुसार, अमेरिकेचे राष्ट्राध्यक्ष डोनाल्ड ट्रम्प यांनी एलॉन मस्क यांना या अंतराळवीरांना लवकरात लवकर घरी आणण्याची व्यवस्था करण्यास सांगितले होते.
