Sushilkumar Shinde : मंत्रिपदाच्या कारकि‍र्दीत जम्मू काश्मीरला भेट देताना मी घाबरलो होतो, अशी कबुली खुद्द तत्कालीन गृहमंत्री सुशीलकुमार शिंदे यांनी दिली आहे. दिल्लीत आयोजित केलेल्या Five Decades in Politics या पुस्तक प्रकाशनाच्या वेळी ते बोलत होते. हिंदुस्तान टाईम्सने यासंदर्भातील वृत्त दिलं आहे. "मी गृहमंत्री होण्यापूर्वी शिक्षणतज्ज्ञ विजय धर यांना भेटत असे. त्यांच्याकडून मी सल्ला घ्यायचो. त्यांनी त्यावेळी मला इकडे तिकडे न फिरता श्रीनगरच्या लाल चौकात भेट द्यायला सांगितली. तिथल्या लोकांना भेटून दल सरोवराभोवती फिरण्याचा सल्ला दिला होता. यामुळे माझी चांगली प्रसिद्धी झाली. लोकांना वाटलं की एक गृहमंत्री इथं बिनधास्त जातो. पण लोकांना काय माहीत की मी किती घाबरलो होतो. मी तुम्हाला हसवण्यासाठी हे सांगितले, पण एक माजी पोलीस असे बोलू शकत नाही", असं सुशीलकुमार शिंदे म्हणाले. त्यांच्या या वक्तव्याची सध्या तुफान चर्चा सुरू आहे. #WATCH | Delhi: At the launch of his memoir 'Five Decades of Politics', Congress leader Sushilkumar Shinde says, "Before I became the Home Minister, I visited him (educationist Vijay Dhar). I used to ask him for advice. He advised me to not roam around but to visit Lal Chowk (in… pic.twitter.com/MJ4QhrKbwa— ANI (@ANI) September 10, 2024 २०१२ मध्ये तत्कालीन पंतप्रधान मनमोहन सिंग यांनी भारताचे गृहमंत्री म्हणून सुशीलकुमार यांची नियुक्ती केली होती. पी. चिदंबरम यांच्यानंतर गृहमंत्रीपदाचा कार्यभार सुशीलकुमार शिंदे यांनी सांभाळला होता. त्यांनी त्यांच्या कार्यकाळात श्रीनगरच्या लाल चौकात खरेदी केली होती. आपल्या कुटुंबासाठी खरेदी करण्यासाठी ते जम्मू काश्मीरच्या राजधानीतील काश्मीर आर्टस शोरुममध्ये आले होते. त्यानंतर त्यांच्याबरोबर ओमर अब्दुल्लासुद्धा होते. या भेटीदरम्यान सुशीलकुमार शिंदे यांनी श्रीनगर येथील क्लॉक टॉवरलाही भेट दिली होती. 'घंटा घर' म्हणून ओळखला जाणारा क्लॉक टॉवर १९७८ मध्ये माजी मुख्यमंत्री शेख अब्दुल्ला यांच्या विनंतीवरून बांधण्यात आला होता. २००८ आणि २०१० मध्ये जेव्हा काश्मीर खोऱ्यात निदर्शने झाली, तेव्हा टॉवरवर पाकिस्तानी ध्वज फडकवण्यात आले होते. शिंदे यांच्या कार्यकाळात २६/११चा मुंबई हल्ल्यातील दोषी अजमल कसाब आणि संसदेवरील हल्ल्याचा दोषी अफझल गुरू आणि २०१२ च्या दिल्ली सामूहिक बलात्कार प्रकरणातील आरोपींना फाशीची शिक्षा देण्यात आली.
