तामिळनाडूत पेट्रोल स्वस्त, राज्य सरकार सहन करणार ११६० कोटींचा तोटा; महाराष्ट्रात कधी?

“तामिळनाडूत २.६ कोटी लोकं दुचाकी वापरतात. सामान्य नागरिकांचा विचार करता आम्ही पेट्रोलच्या किंमती ३ रुपयांनी कमी करण्याचा निर्णय घेतला आहे. यामुळे सरकारला १,१६० कोटींचा तोटा सहन करावा लागणार आहे”, असं अर्थमत्री पी. थैगा राजन यांनी सांगितलं.

देशाची राजधानी दिल्लीत आज पेट्रोलचा भाव १०१.८४ रुपये आणि डिझेलचा भाव ८९.८७ रुपये प्रति लिटर आहे. मुंबईत एक लिटर पेट्रोलचा भाव १०७.८३ रुपये आणि डिझेलचा भाव ९७.४५ रुपये आहे. कोलकातामध्ये पेट्रोलचा भाव १०२.०८ रुपये आणि डिझेलचा भाव ९३.०२ रुपये प्रति लिटर आहे. तर चेन्नईत पेट्रोलचा भाव १०२.४९ आणि डिझेलचा भाव प्रति लिटर ९४.३९ रुपये आहे. तामिळनाडुत पेट्रोलचे दर कमी झाल्याने आता महाराष्ट्रातील जनताही राज्य सरकारकडे आस लावून बसली आहे.