तेजपाल यांची अटक लांबणीवर

सहकारी महिला पत्रकाराचा विनयभंग आणि लैंगिक हल्ला केल्याचा आरोप असलेले ‘तहलका’चे संपादक तरुण तेजपाल यांची चौकशी न करताच गोव्यातील पोलिसांचे पथक रविवारी नवी दिल्लीहून परतले. मात्र, या प्रकरणी त्यांनी तहलकाच्या तीन कर्मचाऱ्यांचे जबाब घेतले. पोलिसांनी तहलकाच्या कार्यालयातील हार्ड डिस्क व काही कागदपत्रे जप्त केल्याचेही समजते.
गोव्याच्या गुन्हे अन्वेषण शाखेचे पोलिस उपअधीक्षक सॅमी टॅवरिस यांच्या नेतृत्वाखालील पथकाने दिल्लीतील गोवा सदन येथे रविवारी सकाळी ९ वाजल्यापासून या तीन कर्मचाऱ्यांचा रविवारी जबाब घेतला. मात्र या पथकाने तेजपाल यांची चौकशी केली नाही. मंगळवारी हे पथक संबंधित महिला पत्रकाराचा मुंबईत जबाब घेईल व त्यानंतर तेजपाल यांची चौकशी करण्यात येईल, असे सूत्रांनी सांगितले.