तेलंगणचे काँग्रेसचे प्रमुख रेवंत रेड्डी यांनी ऑल इंडिया मजलिस-ए-इत्तेहादुस मुस्लिमीन चे प्रमुख असदुद्दीन ओवैसी यांच्यावर टीका केली होती. ओवैसी हे म्हणजे राष्ट्रीय स्वयंसेवक संघाच्या हातातलं बाहुलं आहे असं रेड्डी यांनी म्हटलं होतं. या टीकेला आता ओवैसी यांनी कठोर शब्दात उत्तर दिलं आहे. काँग्रेस फक्त आपल्या कपड्यांवरुन आणि दाढीवरुन आरोप करत असते, आरोप करायला काही मिळालं नाही की अशा प्रकारे आरोप केले जातात असं म्हणत ओवैसी यांनी रेड्डी यांना प्रत्युत्तर दिलं आहे.
असदुद्दीन ओवैसी यांनी एका रॅलीमध्ये रेड्डी यांना उत्तर दिलं. तुमच्याकडे (रेवंत रेड्डी) आमच्या विरोधात बोलण्यासारखं काहीही राहिलेलं नाही. त्यामुळे आता आमच्या कपड्याबाबत आणि दाढीविषयी बोलत आहात. मला कळसुत्री बाहुली म्हणत आहात मात्र मी म्हणतो ते तुम्हीच आहात. भाजपा आणि काँग्रेस यांच्यात काही अंतर नाही असंही ओवैसी म्हणाले.
तेलंगणमध्ये काँग्रेसचे प्रमुख रेवंत रेड्डी म्हणाले, ओवैसी शेरवानीच्या आतामध्ये खाकी पँट घालातात. आरएसएसची खाकी पँट घालून ओवैसी विरोधाचं राजकारण करत आहेत. यावर आता ओवैसी यांनी पलटवार करत रेवंत रेड्डींवर टीका केली आहे. त्यांना ओवैसी यांनी उत्तर देत काही मुद्दा मिळाला नाही की आमच्या दाढी आणि कपड्यांवरुन आम्हाला टार्गेट केलं जातं असं ओवैसी म्हणाले आहेत.
