एपी, सिडनी
सिडनीतील एका वर्दळीच्या शॉपिंग सेंटरमध्ये सहा जणांना चाकूने भोसकून ठार करणाऱ्या हल्लेखोराची पोलिसांनी रविवारी ओळख पटवली. या इसमाला एका महिला पोलिसाने नंतर गोळय़ा घालून ठार मारले होते.शहराच्या पूर्व उपनगरातील बाँडी जंक्शनवरील वेस्टफील्ड शॉपिंग सेंटरमध्ये शनिवारी दुपारी झालेल्या या हल्ल्यासाठी जोएल काऊची (४०) हा जबाबदार होता, असे न्यू साऊथ वेल्स (एनएसडब्ल्यू) पोलिसांनी सांगितले.
काऊची याला अनिर्दिष्ट मानसिक समस्या होती आणि पोलीस तपासकर्त्यांना हा दहशतवादाशी संबंधित हल्ला असल्याचे वाटत नाही, असे एनएसडब्ल्यूचे सहायक पोलीस आयुक्त अँथनी कुक यांनी पत्रकार परिषदेत सांगितले. ‘आम्ही हल्लेखोराची संपूर्ण माहिती घेत आहोत, मात्र हा मुद्दा संबंधित व्यक्तीच्या मानसिक आरोग्याशी संबंधित असल्याचे या टप्प्यावर आम्हाला निश्चितपणे वाटते’, असे ते म्हणाले.
