‘टायटॅनिक’ बुडवणाऱ्या हिमनगाचा आकार वाढतोय, संशोधकांनाही बसला धक्का

ग्रीनलॅण्डमधील सर्वात मोठ्या हिमनगांपैकी एक असणाऱ्या जॅकोबशवनचा आकार १९ व्या शतकामध्ये ४० किलोमीटरने कमी झाल्याचे संशोधकांचे म्हणणे होते. मात्र ‘नासा’ने नुकत्याच केलेल्या एका अभ्यासामध्ये या हिमनगाचा वितळण्याचा वेग मंदावल्याचे दिसून आले आहे. इतकेच नाही तर या हिमनगाचा आकार आता हळूहळू वाढत असल्याचेही ‘नासा’च्या अभ्यासकांनी आपल्या अहवालात नमूद केले आहे.

नेचर जिओसायन्स नावाने प्रकाशित करण्यात आलेल्या या अहवालामध्ये जॅकोबशवन हिमनगासंदर्भात माहिती देण्यात आली आहे. २०१६ पासून या हिमनगावरील बर्फाची जाडी वाढली आहे. समुद्रातील पाण्याचे तापमान थंड असल्याने या हिमनगावरील बर्फाची जाडी वाढत असल्याचे निरिक्षण अभ्यासकांनी नोंदवले आहे. यामुळेच हा हिमनग आता वितळण्याऐवजी आकाराने वाढताना दिसत आहे. जाडी वाढल्याने या हिमनगाची हलचाल संथ झाली असून त्याचा पाण्याखालील भाग आकाराने वाढत असल्याचे या अहवालामध्ये म्हटले आहे. उत्तर अटलांटिक महासागरामधून आर्टिक महासागरामध्ये थंड पाण्याचा प्रवाह येत असल्याने हा बदल दिसून येत असल्याचे संशोधक सांगतात.

‘या हिमनगाचा आकार वाढत आहे यावर आधी आमचा विश्वासच बसत नव्हता. मागील वीस वर्षांपासून हा हिमनग वितळत असल्याने तो दिवसोंदिवस लहान होत जाणार असंच आम्ही गृहित धरलं होतं. मात्र या अभ्यासानंतर आमचा अंदाज चुकीचा ठरल्याचे सिद्ध झाले आहे,’ असं ‘नासा’च्या जेट प्रॉप्लशन लॅब्रटोरीच्या हिमनग अभ्यासक अला कॅझेन्डर यांनी सांगितले.