येचुरींमुळे ‘इंडिया’ महाआघाडी एकत्र! शोकसभेत घटक पक्षांच्या नेत्यांकडून भावना व्यक्त

यावेळी लोकसभेतील विरोधी पक्षनेते राहुल गांधी यांनी येचुरी यांच्या आठवणींना उजाळा देताना ते राजकीय व्यवस्थेमध्ये काम करणारे आपले मित्र होते अशा शब्दांमध्ये आपल्या भावना व्यक्त केल्या. ‘इंडिया’ तसेच ‘यूपीए’मध्ये त्यांनी काँग्रेस आणि अन्य पक्षांना जोडणारा पूल अशी भूमिका बजावली असे राहुल म्हणाले. आपल्या राजकीय कारकिर्दीच्या अगदी सुरुवातीपासून आपण येचुरी यांचे निरीक्षण करत आलो असे त्यांनी सांगितले. ‘‘ते लवचिक होते, ऐकून घेणारे होते, अगदी वैचारिक विरोधकांचेही ऐकून घेत असत. त्यांच्यामध्ये आपण कुठून आलो आहोत हे समजून घेण्याची क्षमता होती,’’ असे राहुल म्हणाले. तर ‘इंडिया’ आघाडी अस्तित्वात आली त्याचे मोठे श्रेय येचुरी यांचे होते असे नॅशनल कॉन्फरन्सचे नेते फारुख अब्दुल्ला यांनी सांगितले. श्रद्धांजली सभेला माकपच्या नेत्यांबरोबरच काँग्रेसचे अध्यक्ष मल्लिकार्जुन खरगे, राहुल गांधी, फारुख अब्दुल्ला, समाजवादी पक्षाचे नेते रामगोपाल यादव, राष्ट्रवादी काँग्रेसच्या सुप्रिया सुळे, द्रमुकच्या कन्निमोळी इत्यादी नेते उपस्थित होते.