गुजरातमध्ये एक धक्कादायक प्रकार समोर आला आहे. जय श्री रामचा नारा देण्यास सांगत एका मुस्लीम तरुणाला टोळक्याने मारहाण केली आहे. याबाबतचा व्हिडीओ आमदार जिग्नेश मेवानी यांनी शेअर केला आहे. याबद्दल पोलीस महासंचालकांना भेटून आरोपींविरोधात कडक कारवाई करण्याची मागणी करणार असल्याचं जिग्नेश मेवानी यांनी सांगितलं.
व्हिडीओत काय?
गुजरातमधील बनासकांठा जिल्ह्यातील दिओदर तहसील परिसरात ही घटना घडल्याचं सांगितलं जात आहे. या व्हिडीओत तीन तरुण एकाला जय श्रीरामचा नारा देण्यास सांगत आहेत. तसेच, जोपर्यंत जय श्री राम म्हणत नाही, तोपर्यंत त्याला लाठ्या-काठ्यांनी मारहाण केल्याचं दिसत आहे. २२ जुलै २०२३ चा हा व्हिडीओ असल्याचा दावा करण्यात येत आहे.
याबाबत जग्नेश मेवानी यांनी ट्वीट केलं आहे. त्या ट्वीटमध्ये जिग्नेश मेवानी म्हणाले की, “हे दोन व्हिडीओ आमच्या प्रगतशील गुजरातमधील बनासकांठ जिल्ह्यातील दिओदर तहसील येथील आहेत. यात एका मुस्लीम तरुणाला ( गुरांना चारण्यासाठी जात होता ) तथाकथित गो-रक्षकांनी मारहाण केली आहे. जय श्री राम बोलत नाही, तोपर्यंत या तरुणाला मारहाण करण्यात आली.”
“याप्रकरणी गुजरातचे पोलीस महासंचालक यांची भेट घेत आरोपींविरोधात कडक कारवाई करण्याची मागणी करणार आहे,” असेही जिग्नेश मेवानी यांनी ट्वीटमध्ये म्हटलं आहे.