Indian Immigrants Deported from US : अमेरिकेतून आलेले स्थलांतरिताचे विमान अमृतसरमध्ये उतरताच दोन भावांना अटक, नेमकं कारण काय?

पोलिसांनी सांगितले की, अटक करण्यात आलेले संदीप आणि प्रदीप हे दोघे चुलत भाऊ आहेत आणि २०२३ मध्ये पटियाला जिल्ह्यातील राजपुरा शहरात दाखल झालेल्या एका खून प्रकरणात ते पोलिसांना हवे होते. शनिवारी अमृतसरच्या श्री गुरु रामदास विमानतळावर उतरताच पटियाला पोलिसांच्या पथकाने त्यांना अटक केली.

पोलिसांनी सांगितले की, हे दोन्ही आरोपी राजपुरा शहरातील रहिवासी आहेत आणि त्यांना या खून प्रकरणात आधीच फरार गुन्हेगार घोषित करण्यात आले होते. दोन्ही आरोपींविरोधात २६ जून २०२३ रोजी भारतीय दंड संहितेच्या कलम ३०२, ३०७, ३२३, ५०६, १४८ आणि १४९ या भारतीय न्याय संहिता कलमांच्या अधारावर पटियाला पोलीस ठाण्यात हत्येचा गुन्हा दाखल करण्यात आलेला आहे. असे असले तरी दोन्ही आरोपींविरोधात ‘लूक आऊट सर्क्युलर’ जारी केले नसल्याचे पोलिसांनी सांगितले.

ट्रम्प प्रशासनाच्या बेकायदेशीर स्थलांतरावर कारवाई सुरू केली आहे . यादरम्यान ११९ भारतीय निर्वासितांच्या दुसरी तुकडी घेऊन अमेरिकेचे लष्करी विमान शनिवारी रात्री उशिरा अमृतसरमध्ये दाखल झाले.

कोणत्या राज्यातील किती जण?

अमेरिकेतून भारतात परत पाठवण्यात आलेल्या स्थलांतरीतांमध्ये ६७ जण हे पंजाबचे आणि ३३ जण हे हरियाणामधील असल्याचे प्रशासकीय अधिकार्‍यांनी सांगितले. उरलेल्यांपैकी आठ जण गुजरात, तीन उत्तर प्रदेश, दोन गोवा आणि महाराष्ट्र, राजस्थान येथील प्रत्येकी दोन तर हिमाचल प्रदेश आणि जम्मू काश्मीर येथील प्रत्येकी एक जण आहे. यापूर्वी ५ फेब्रुवारी रोजी अमेरिकेने पहिल्या विमानाने १०४ निर्वासितांना परत पाठवले होते. हे विमान देखील पंजाबच्या अमृतसर येथीव विमानतळावर उतरले होते.