धार्मिक स्थळांची विटंबना करून दंगे घडवण्याचा कट रचणाऱ्या दोघांना उत्तर प्रदेशातील बिजनौर पोलिसांनी अटक केली आहे. दोघांनी शेरकोट पोलीस ठाणे हद्दतील काही मजारवरील चादरी जाळल्याचेही पुढे आले आहे. मोहम्मद कमाल (३५) आणि मोहम्मद आदिल (२३) अशी अटक केलेल्या दोघांची नावे आहेत, पोलिसांनी दोघांवरही गुन्हा दाखल केला आहे.
पोलिसांनी दिलेल्या माहितीनुसार, मोहम्मद कमाल आणि मोहम्मद आदिल हे दोघेही भाऊ आहेत. यापैकी मोहम्मद कमाल हा काही दिवसांपूर्वीच परदेशातून भारतात परत आला होता. तर त्याचा भाऊ आदिल हा प्लंबर म्हणून काम करतो. या दोघांचाही कावड यात्रेदरम्यान दंगे घडवण्याचा उद्देश होता.
हेही वाचा – “…त्यामुळे धनुष्यबाण आमचाच आहे” बंडखोर आमदार गुलाबराव पाटलांचं मोठं विधान
दरम्यान, रविवारी ( २४ जुलै ) दुपारी ४ वाजेच्या दरम्यान दोघांनी शेरकोट पोलीस ठाणे हद्दतील एका मजारीच्या इमारतीचे नुकसान केले, अशी माहिती मजारच्या केअरटेकरने पोलिसांना दिली होती. तसेच हे दोघे भगवे दुपट्टे बांधून होते असेही त्याने पोलिसांना सांगितले. पोलिसांना तत्काळ घटनास्थळी दाखल होत आढावा घेतला. तेंव्हा दोघांनी तेथून जवळचं असलेल्या मंदिरांचेही नुकसान केले, अशी माहिती पोलिसांना मिळाली. स्थानिकांनी दिलेल्या माहितीनुसार पोलिसांनी आरोपींना शोधण्याचा प्रयत्न केला, तेव्हा तिथूनच काही अंतरावर दोघेही लपले असल्याची माहिती पोलिसांनी मिळाली. अखेर पोलिसांनी पाठलाग करत दोघांनाही अटक केली.
पोलिसांनी दोन्ही आरोपींविरोधात गुन्हा दाखल केला असून हा सर्व प्रकार करण्यामागे त्यांचा काय उद्देश होता, याची चौकशी पोलीस करत आहेत. तसेच यामागे कोणत्या संघटनेचा हात आहे का, याचा तपासदेखील सुरू असल्याचे पोलिासांनी सांगितले.
