केरळमध्ये धनलाभासाठी दोन महिलांचा बळी; कथित तांत्रिकासह दाम्पत्य पोलिसांच्या ताब्यात

या प्रकरणात पेरुमबाव्हूर येथून शफी ऊर्फ राशीद यास अटक करण्यात आली आहे. आपण तांत्रिक असल्याचे त्याने या आरोपी दाम्पत्यास भासविले होते. ताब्यात घेण्यात आलेला भागवपाल सिंह हा पारंपरिक वैद्य असल्याचा दावा करतो. त्याच्याकडे उपचारासाठी अनेकजण येतात. या प्रकरणात तो पहिला आरोपी आहे. त्याला आणि त्याच्या पत्नीला रीतसर अटक होईल, असे कोची शहर पोलीस आयुक्त सी. एच. नागराजू यांनी सांगितले. शफी याला पैशाचे प्रलोभन दाखविण्यात आल्याने त्याने या दोन महिलांना भागवपाल याच्याकडे उपचाराच्याबहाण्याने नेले होते. अत्यंत क्रूरपणे या महिलांची हत्या करण्यात आली, असे नागराजू म्हणाले. हा नरबळीचा प्रकार असावा, असा पोलिसांना संशय आहे.   

प्रकरणाची पार्श्वभूमी : पोलिसांनी दिलेल्या माहितीनुसार, एर्नाकूलम जिल्ह्यातील रोस्लीन ही लॉटरी विक्रेती जूनमध्ये, तर पद्मा ही लॉटरी विक्रेती सप्टेंबरमध्ये बेपत्ता झाली. पद्माचा शोध घेतला जात असताना पोलिसांना तो नरबळीचा प्रकार असल्याची शक्यता वाटली. आर्थिक हलाखीत असलेल्या आरोपी दाम्पत्याने धनलाभासाठी हे केल्याचा आरोप आहे. तशी कबुली त्यांनी तसेच त्यांच्या हस्तकाने दिल्याचा दावा पोलिसांनी केला. मूळची तमिळनाडूची असलेल्या पद्माच्या मोबाइलचा कॉल रेकॉर्ड तपासला असता धागेदोरे शफीपर्यंत पोहोचले. त्याच्या चौकशीत हे प्रकरण उघड झाले.