Udhaynidhi DCM : तमिळनाडूच्या मंत्रिमंडळात मोठे फेरबदल; उदयनिधी यांची उपमुख्यमंत्री पदी नियुक्ती, तर तुरुंगातून सुटून आलेल्या नेत्यालाही मंत्रीपदाची माळ!

सेंथिल बालाजी व्यतिरिक्त द्रमुकच्या तीन नेत्यांचा मंत्रिमंडळात समावेश करण्यात आला आहे. डॉ. गोवी. चेझियान, थिरू आर. राजेंद्रन आणि थिरू एस.एम.नासर यांचा समावेश झाला आहे. सेंथिल बालाजी यांना गेल्यावर्षी जून महिन्यात सक्तवसुली संचालनालयाने अटक केली होती. यावर्षी फेब्रुवारीमध्ये त्यांनी तामिळनाडूच्या मंत्रिमंडळाचा राजीनामादिला होता. महत्त्वाचं म्हणजे उदयनिधी सध्या तामिळनाडूचे युवक कल्याण आणि क्रीडा विकास मंत्री आहेत.

उदयनिधी हे अभिनेते आणि निर्माते असून ते २०२२ मध्ये पहिल्यांदाच आमदार बनले आहेत. पहिल्यांदाच आमदार झाल्यानंतर त्यांना पहिल्या टर्ममध्ये मंत्रिमंडळात संधी मिळाली. मंत्रिमंडळात त्यांना क्रीडा आणि युवा विकास मंत्री हे खातं मिळालं होतं. दोनच वर्षांत त्यांनी चांगली प्रगती साधली. लोकसभा निवडणुकीच्या काळात त्यांनी जोरदार प्रचार केला होता. लोकसभा निवडणुकीत उदयनिधी यांनी द्रविड मुन्नेत्र कझगम पक्षाचा चांगला प्रचार केला होता. लोकसभा निवडणुकीच्या विजयाचं श्रेय उदयनिधी यांनाही दिलं जातंय. त्याचंच बक्षिस म्हणून उदयनिधी यांच्या गळ्यात उपमुख्यमंत्री पदाची माळ घालण्यात आली आहे. तामिळनाडूमध्ये २०२६ ला विधानसभेच्या निवडणुका आहेत. उदयनिधी यांच्या लोकप्रियतेचा फायदा घेण्याकरता मंत्रिमडळात मोठे बदल करण्यात आल्याची चर्चा राजकीय वर्तुळात रंगली आहे.

हेही वाचा >> दक्षिणेत भाजपचा मतटक्का वाढला, पण जागा तितक्याच… तामिळनाडूत मात्र स्टॅलिन एके स्टॅलिनच!

सनातन धर्मावरील भाष्यावरून आले होते चर्चेत

काही महिन्यांपूर्वी त्यांनी हिंदू धर्माविरोधात भाष्य केलं होतं. “सनातन धर्म हा समानता आणि सामाजिक न्यायाच्या विरोधात आहे. त्यामुळे अशा गोष्टींना विरोध करण्याऐवजी त्यांचं समूळ उच्चाटन करायला हवं. डास, डेंग्यू, मलेरिया आणि करोनासारख्या आजारांना विरोध करता येऊ शकत नाही. त्यांचं उच्चाटनच करायला हवं. त्याचप्रमाणे सनातन धर्माचंही उच्चाटन व्हायला हवं”, असं उदयनिधी स्टॅलिन म्हणाले होते.