रशियाने युक्रेनविरोधात पुकारलेल्या युद्धामध्ये अनेक नागरिकांना आपला जीव गमवावा लागला आहे. रशियन सैन्याविरोधात लढण्यासाठी अनेक नागरिकही सैन्यासोबत लढत आहेत. अभिनेता पाशा ली (Pasha Lee) यानेही देशाचं संरक्षण कऱण्यासाठी सुरक्षा दलात सामील होण्याचा निर्णय घेतला होता. रशियन सैन्याविरोधात लढताना या ३३ वर्षीय अभिनेत्याचा मृत्यू झाला.
पाशा याने मृत्यूपूर्वी इंस्टाग्रामला एक पोस्ट शेअर केली होती. या पोस्टमध्ये त्याने आपण सर्व काही सांभाळून घेऊ असं म्हटलं होतं. “गेल्या ४८ तासांपासून फक्त बसून राहत आपल्यावर कशा पद्दतीने बॉम्बने हल्ला केला जात आहे याचा फोटो घेण्याची संधी आहे, पण आम्ही हसत आहोत कारण आम्ही सर्व सांभाळून घेऊ,” असं त्याने पोस्टमध्ये म्हटलं होतं.
गेल्या महिन्यात रशियाने युक्रेनवर आक्रमण केल्यानंतर अभिनेत्याने रशियन सैन्याचा सामना करण्यासाठी प्रादेशिक संरक्षण दलात सहभाग नोंदवला होता. अधिकाऱ्यांनीही पाशाच्या मृत्यूला दुजोरा दिला आहे.
