Donald Trump : डोनाल्ड ट्रम्प अन् एलॉन मस्क यांच्या विरोधात हजारो अमेरिकन नागरिक रस्त्यावर उतरले, नेमकं कारण काय?

डोनाल्ड ट्रम्प आणि एलॉन मस्क यांच्या धोरणांच्या विरोधात अमेरिकन नागरिक ‘हॅन्ड्स ऑफ’ असे पोस्टर्स हातात घेऊन रस्त्यावर उतरले आहेत. सरकारी नोकऱ्यांमध्ये कपातीचा निर्णय, देशाची अर्थव्यवस्था, मानवाधिकार आणि टॅरिफ धोरण अशा मुद्द्यांच्या पार्श्वभूमीवर अमेरिकन नागरिकांनी शनिवारी मोठ्या प्रमाणात मोर्चे काढले आहेत. काही दिवसांपूर्वी युनायटेड स्टेट्समधील सरकारी जमिनींचे व्यवस्थापन आणि माजी सैनिकांची काळजी घेणाऱ्या कर्मचाऱ्यांमध्ये मोठी कपात करण्यात आली, गृह, ऊर्जा, माजी सैनिक व्यवहार, कृषी, आरोग्य आणि मानवी सेवा अशा विभागातील कर्मचाऱ्यांवर बेरोजगारीची कुऱ्हाड कोसळली. अशा वेगवेगळ्या निर्णयांच्या निषेधार्थ आता अमेरिकन नागरिकांनी रस्त्यावर उतरून संताप व्यक्त केला आहे.

तसेच डोनाल्ड ट्रम्प आणि त्यांचे सल्लागार एलॉन मस्क ज्या पद्धतीने देश चालवत आहेत, त्याचा नागरिकांनी निषेध व्यक्त केला आहे. डोनाल्ड ट्रम्प यांच्या प्रशासनाने घेतलेल्या धोरणांचा विरोध करत निदर्शकांनी आर्थिक धोरणांबद्दल चिंता व्यक्त केली आहे. तसेच काही निदर्शकांनी डोनाल्ड ट्रम्प आपल्याला जागतिक मंदीमध्ये ढकलतील, असंही म्हटलं आहे. दरम्यान, वृत्तानुसार, या आंदोलनामध्ये नागरी हक्क संघटना, कामगार संघटना, वकिल संघटनासह यूएसमधील १५० हून अधिक संघटना आणि हजारो अमेरिकन नागरिक तब्बल १२०० ठिकाणी रस्त्यावर उतरले आहेत.

दरम्यान, डोनाल्ड ट्रम्प सत्तेत आल्यापासून इलॉन मस्क यांच्या नेतृत्वाखाली विभागाने काही निर्णय घेतले आणि त्यामध्ये सामाजिक सुरक्षा प्रशासन प्रादेशिक कार्यालये बंद करणे, स्थलांतरितांना निर्वासित करणे आणि ट्रान्सजेंडर संरक्षण आणि आरोग्य कार्यक्रमांसाठी निधी कमी करणे अशा प्रकारचे निर्णय घेण्यात आल्यामुळे अमेरिकेतील नागरिकांनी आता डोनाल्ड ट्रम्प यांच्या सरकारच्या विरोधात संताप व्यक्त केला आहे. या संदर्भातील वृत्त इंडियन एक्स्प्रेसने दिलं आहे.