‘वंदे मातरम्’ सुरूच राहणार; कमलनाथ यांचे घूमजाव

मध्य प्रदेशमध्ये बाबूलाल गौर मुख्यमंत्री असताना सचिवालयामध्ये दर महिन्याच्या पहिल्या तारखेला सर्व सरकारी कर्मचाऱ्यांनी वंदे मातरम् म्हणावे असा निर्णय घेण्यात आला होता आणि तेव्हापासून ही प्रथा कायम होती. मात्र कमलनाथ यांनी सत्तेवर येताच ही प्रथा बंद करण्याचा निर्णय जाहीर केला. त्यामुळे १ जानेवारी रोजी सचिवालयामध्ये वंदे मातरम् म्हणण्यात आले नाही. त्यावर भाजपने जोरदार टीका केली.

वंदे मातरम् मुळे विशिष्ट वर्गाच्या भावना दुखावल्या जातात म्हणून कमलनाथ यांनी हा निर्णय घेतल्याचा आरोप भाजपचे राष्ट्रीय सरचिटणीस कैलास विजयवर्गीय यांनी केला. तर विधिमंडळ अधिवेशनाच्या पहिल्याच दिवशी सचिवालयाच्या आवारामध्ये वंदे मातरम् म्हणणार असल्याचे ट्वीट चौहान यांनी केले आहे. या मुद्दय़ावरून आता कमलनाथ यांनी सारवासारव करण्याचा प्रयत्न केला आहे.