दया अर्जावरील सुनावणीसाठी आता घटनापीठ – सरन्यायाधीश

नेमका प्रश्न काय?
भारताचे ४० वे सरन्यायाधीश म्हणून सूत्रे हाती घेण्यापूर्वी सथशिवम् यांनी दया अर्जाच्या प्रश्नावर भाष्य केले होते. गुन्हेगारांना मृत्युदंडाची शिक्षा ठोठावली जाते. या शिक्षेचा पुनर्विचार करण्याबाबत त्यांच्याकडून याचिकाही दाखल होतात. मात्र अशा याचिकांच्या सुनावणीस काही वेळा विलंब होतो. या याचिकांची सुनावणी ही दोन अथवा तीन न्यायाधीशांच्या खंडपीठासमोर होते आणि अनेकदा या खंडपीठात मतैक्याचा अभाव असतो आणि म्हणूनच, अशा प्रकरणांमध्ये अधिकृत निर्णय देण्यापूर्वी किमान महिनाभर आधी संबंधित अर्ज घटनापीठाकडे विचारार्थ पाठविले जावेत किंवा कसे, याबाबत सध्या खल चालू आहे.

पुनर्विचारार्थ आलेल्या दया अर्जाच्या प्रश्नावर संभाव्य तोडगा
दया अर्जाच्या याचिका निकाली काढण्यात झालेल्या विलंबावर कोणता व्यावहारिक तोडगा काढता येईल याचा आपण विचार करीत आहोत. अनेकदा केवळ मतैक्याच्या अभावामुळे होणारा विलंब टाळण्यासाठी, तसेच बहुमताने आणि न्याय्य निर्णय गतिमानतेने व्हावेत म्हणूनच अशा प्रकरणांबाबत निर्णय घेण्यासाठी पाच न्यायाधीशांचे घटनापीठ स्थापन केले जावे. अंतिम निर्णय जाहीर करण्यापूर्वी किमान महिनाभर आधी सदर प्रकरण घटनापीठाकडे सूपूर्द केले जावे , असा आपला पर्याय असल्याचे सरन्यायाधीशांनी नमूद केले.