पाच उठाबशा काढ आणि जा! बिहारमध्ये बलात्काराच्या आरोपीला अजब शिक्षा, व्हायरल व्हिडीओ पाहून नेटकऱ्यांचा संताप

आरोपीने अल्पवयीन मुलीला चॉकलेट देण्याच्या बहाण्याने पोल्ट्री फार्मवर नेऊन बलात्कार केला होता. मात्र पंचायतीने आरोपीला पोलिसांकडे न सोपवण्याचा निर्णय घेतला. विशेष म्हणजे, आरोपी बलात्काराचा दोषी असल्याचं त्यांनी मान्य केलं होतं. मुलीला एका निर्जनस्थळी नेलं असल्याने पंचायतीने आरोपीला ही शिक्षा सुनावली.

पंचायतीने आरोपीला शिक्षा म्हणून पाच उठाबशा काढायला लावल्या. या शिक्षेचा व्हिडीओ सध्या सोशल मीडियावर व्हायरल होत आहे. यानंतर अनेकांनी याविरोधात संताप व्यक्त केला.

पोलीस अधीक्षक गौरव मंगला यांनी याप्रकरणी गुन्हा दाखल करण्यात आला असून, आरोपीविरोधात कारवाई केली जाईल असं आश्वासन दिलं आहे. दरम्यान हे प्रकरण दाबण्याचा प्रयत्न करणाऱ्यांचीही पोलीस चौकशी करणार असून, कारवाईची शक्यता आहे.