बिहारमधील मासे व्यवसायिक मोहम्मद मिया यांचा २२ मे रोजी गोळ्या घालून खून करण्यात आला होता. या खूनप्रकरणी पोलिसांनी मोठे धागेदोरे हाती लागले आहेत. मृत मोहम्मद मियां यांची पत्नी नूरजहां खातून आणि तिचा प्रियकर नौशाद आलम हे या खून प्रकरणातील मुख्य आरोपी असल्याचं समोर आलं आहे. सुपारी देऊन मोहम्मद मियां यांचा खून करण्यात आला आहे. याप्रकरणी पोलिसांनी आरोपींना अटक केली आहे.
मिळालेल्या माहितीनुसार, गोपालगंज जिल्ह्यातील लाढपूर या गावामधील मोहम्मद मियां यांची पत्नी नूरजहां खातूनचे नौशाद आलमबरोबर अनैतिक संबंध होते. त्यामुळेच मोहम्मद मियां आपल्या पत्नीला मारहाण करायचा. याच त्रासाला कंटाळून नूरजहां खातूनने प्रियकराबरोबर मिळून पतीचा काटा काढण्याचा निर्णय घेतला. यासाठी दोन जणांना सुपारी देण्यात आली होती.
आरोपींनी २८ हजारात बंदूक आणि काडतुसांची केली खरेदी
अटकेत असलेला आरोपी मंसूर आलम आणि परवेज आलम यांनी पोलीस तपासात सांगितलं की, सहा मुलांची आई असलेल्या नूरजहां खातूनने ५० हजार रुपयांत पतीच्या खूनाची सुपारी दिली होती. मिळालेल्या पैशातून २८ हजार रुपयांची एक बंदूक आणि ४ जिवंत काडतुसे विकत घेण्यात आली. घटनेच्या रात्री नूरजहां फोनवरून आदेश देत खिडकीतून सर्व पाहत होती.
अलीकडेच मोहम्मद दुबईतून आले होते
पोलिसांनी सांगितल्यानुसार, मोहम्मद मियां आपल्या घरासमोरील खाटावर झोपले होते. तर, पत्नी घरातून खिडकीतून आरोपींना निर्देश देत होती. अलीकडेच मोहम्मद मियां दुबईतून आले होते. आरोपी नूरजहां म्हणाली की, “पती पत्नीसारखा व्यवहार करत नसे. तसेच, सातत्याने मारहाण करायचा.”
चार आरोपींना केली अटक
गोपालगंज पोलीस अधिकारी स्वर्ण प्रभात यांनी म्हटलं की, “२२ मे रोजी मोहम्मद मियां यांचा गोळ्या घालून खून करण्यात आला होता. यासाठी एसआयटीअंतर्गत चौकशी करण्यात आली. या तपासात मृत मियां यांच्या पत्नीचं अनैतिक संबंध असल्याचं समोर आलं. त्याला विरोध असल्यानेच सुपारी देऊन मियां यांचा खून करण्यात आला. याप्रकरणात चार जणांचा अटक करण्यात आली आहे.”
