उत्तराखंडमध्ये राजकीय उलथापालथ, मुख्यमंत्री रावत राजीनामा देणार?

प्राप्त माहितीनुसार, मुख्यमंत्री रावत हे आज (मंगळवार) सायंकाळी राजीनामा देण्याची शक्यता असुन, ते ४ वाजता राज्यापालांची भेट घेणार आहेत. यावेळी त्यांच्यासोबत प्रदेशाध्यक्ष बन्सीधर भगत देखील असतील. सुत्रांच्या हवाल्याने आज सकाळी काही माध्यमांनी सांगितले होते की, रावत यांना मुख्यमंत्री पदावरून हटवलं जाण्याचं शक्यता आहे.

उत्तराखंडमध्ये नेतृत्वबदल?

मुख्यमंत्री रावत आणि भाजपा अध्यक्ष जेपी नड्डा यांच्यातील बैठक ही दोन दिवसांपासून उत्तराखंडमध्ये सुरू असलेल्या नाट्यमय घडमोडींच्या पार्श्वभूमीवर पार पडली. जेव्हा भाजपा उपाध्यक्ष रमन सिंह आणि सरचिटणीस व राज्याचे प्रभारी दुष्यंत गौतम हे कोणताही नियोजीत कार्यक्रम नसताना देहरादूनला पोहचले आणि राज्याच्या कोर कमिटीतील नेत्यांसोबत बैठक केली होती. यानंतर या दोघांनी देखील आपला अहवाल भाजपा अध्यक्ष नड्डा यांच्याकडे सोपवला होता.

पक्षाच्या आमदारांमधील वाढता असंतोष आणि मंत्रिमंडळाच्या बहुप्रतीक्षित विस्ताराचा वेळोवेळी निर्माण होणारा मुद्दा यामुळे राज्यात नेतृत्वबदल होणार असल्याची जोरदार चर्चा सुरू झाली आहे.