दिल्ली निवडणुकीत मोदींचा केवळ धावता दौरा

आगामी पाच राज्यांतील विधानसभा निवडणुकीत भारतीय जनता पक्षाचे पंतप्रधानपदाचे उमेदवार नरेंद्र मोदी हे दिल्लीत केवळ एक दिवसच प्रचारासाठी येणार असल्याचे भाजपतर्फे मंगळवारी स्पष्ट करण्यात आले. 
दिल्लीमध्ये आधीच अंतर्गत दुफळीमुळे भाजपची स्थिती फारशी चांगली नाही. त्यात जर निवडणुकीत पक्षाला फटका बसला, तर पराभवाचा शिक्का मोदींवर उमटू नये, यासाठी ही रणनिती आखण्यात आल्याचे राजकीय जाणकारांचे मत आहे.
भाजपचे उपाध्यक्ष मुख्तार अब्बास नक्वी म्हणाले, मोदी हे मध्य प्रदेशात चार दिवस प्रचार करणार आहेत. राजस्थानमध्ये तीन तर छत्तीसगढमध्ये दोन दिवस ते प्रचारासाठी येणार आहेत. दिल्लीमध्ये ते केवळ एकच दिवस प्रचार करणार आहेत. ३० नोव्हेंबर रोजी ते दिल्लीमध्ये एक-दोन जाहीर सभा घेण्याची शक्यता आहे.